Sulisitsisut kattunniarput

Sulisitsisut peqatigiiffii marluk kattutilerput, tassa Sulisitsisut, ILIK aamma Sulisitsisut Peqatigiiffiat, ataatsimut kattutilerput.
Allattoq Elisa Isaksen
maajip 27-at 2008 17:27

Pilersaarutigineqartut naapertorlugit ILIK-mi ilaasortat 50-it missaaniittut ukiortaamiit Sulisitsisut Peqatigiiffiannut ilaasortanngussapput.

ILIK-mi siulittaasoq Ole Kielmann Hansen oqarpoq, sulisitsisut ataatsimoornerunissaat pissutsit piumasarigaallusooq. Manna tikillugu sulisitsisut pingasunik peqatigiiffeqarput, taamatullu ingerlaannarsinnaanersugut ILIK-mi ippassaq ataatsimeersuarnitsinni apeqquseratsigu, ilaasortat tamarmik Sulisitsisut Peqatigiiffiallu kattunnissarput tapersersorpaat. Sulisitsisut peqatigiiffiisa pingajuata, NUSUKA-p aamma kattuteqataanissaa ilanngullugu Ole Kielmann Hansenip kissaatigalugu oqarpoq.

- Ukiut 40-t matuma siornagut, Nuummi namminersorlutik inuussutissarsiuteqartut peqatigiiffiliormata, ILIK-up oqaluttuassartaa aallartippoq. Kingorna ILIK sinerissami ilaasortaqalerpoq, sulilu kingusinnerusukkut Akunnittarfiutillit Neriniartarfiutillillu peqatigiiffiat kattuteqatigalugu.

Sulisitsisut Peqatigiiffianni pisortap, Henrik Leth-ip maanna peqatigiiffiit marluk kattunnialernerat iluaraa. - Taamaalillutik sulisitsisut amerlanerusut ataqatigiinnerullutik nukittunerullutillu suliniuteqarsinnaanerat aqqutissiuunneqassammat, minnerunngitsumillu niuertut amerlanerullutik suleqatigiissinnaanerat anguneqassalluni, Henrik Leth oqarpoq.

Peqatigiiffiit taakku marluk kattussinnaanerat ukiorpaalunni eqqartorneqaannarani aamma misilinneqartaraluarpoq iluatsinneq ajortumik, maannakkulli piviusungortussanngorpoq.

Piumassuseqartoqarpallu kajumigineqarlunilu, sulisitsisut peqatigiiffiisa pingajuata, NUSUKAp kattuffilioqataanissaa aamma Henrik Lethimit tikilluaqquneqarpoq.