Sulisitsisut Kattuffiat: Kalaallit Nunaat Naalakkersuisut illaruaatissanngortippaat

Naalakkersuisut Lars-Emil Johansenimik Air Greenlandimi sapaatip akunnerata kingulliup ingerlanerani siulittaasunngortitseriarnerata Namminersornerullutik Oqartussat suliffeqarfiutaasa ingerlanneqarnerinut politikkikkut akuliuteriartarneri uppernarsaqqiinnarpaat.
apriilip 20-at 2009 12:00

Sulisitsisut Kattuffianni, GA-mi, pisortap, Henrik Lethip, siulersuisunilu siulittaasup, Henrik Sørensenip, Air Greenlandip ataatsimeersuarsimanera tusagassiutitigut nalunaarumminni nersualaanngivippaat.

Peqatigiiffiup paasiuminaatsippaa Julia Parsip sooq siulittaasuujunnaarsinneqarsimanera. Pitsaalluinnartumik suleqatikkuminarluni siulersuisunik suleqateqarsimavoq, ilanngullugulu Air Greenland aningaasaqarnikkut ilorraap tungaanut aallartissimagaa, GA erseqqissaavoq.

Naalakkersuisut Namminiilernissaq neqitsiullugu Air Greenlandip siulersuisuini politikkikkut toqqaaniarnera ilalernartinneqanngilaq. Akerliagut Namminiilernermi suliffeqarfiit niuernerpalaarnerusumik ingerlasariaqarnerarpai.

Tusagassiutitigut nalunaaruteqarnermi ataatsimeersuarnerup ingerlasimanera quianaannarnerarpaa, Air Greenlandillu avataanit tatigineqarneranut ajoqataassangatippaa, aammattaarli suliffeqarfiit nunatsinniittut isigineqarnerlulissangatippaat.

Sooruna suliffeqarfiutitta ingerlanneqarneri akimmisaartinniaannarneqartut, nunarpullu illaruaatinngortillugu? Sulisitsisut Kattuffiat naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq