Sulisitsisut: Ineriartortitsinermik siunertaqartumik maqaasisaqarpugut
Suliffissaaleqinerup annikillisinneqarnissaanik taamatullu inissaaleqinerup akiorneqarnissaanik neriorsuutit, SIK-mit nuannaarutigineqarlutik iluarisimaarneqarput.
Neriorsuutilli qanoq akilersorneqarnissaannik taamatullu qanoq tulleriiaarisoqarnissaanik, Naalakkersuisut siulittaasuata ilanngussaqarsimannginnera, Inatsisartuni partiit illuatungiliuttut annersaannit, Inuit Ataqatigiinnit isornartorsiorneqarpoq.
Aamma tamanna Nunatsinni Sulisitsisut peqatigiiffiannit, GA-mit isornartorsiorneqarluni. Taakku ujartorpaat, inuiaqatigiit akilersuisiinnarnagit ineriartortitsineq aqqutigalugu siuarsaasoqarnissaanik oqallittoqarnissaa.
- Inuiaqatigiit akilersuisinnaarnagit ineriartortitsinermik siunertaqartumik Nunap aqunneqarnissaanik pilersaarummik maqaasisaqarpugut. Siunnersuuterpassuit akisoqisut Nunatta karsianit akilersorneqartussat siunniunneqarput. Tamassumunnga taarsiullugu takorusunnerugaluarparput, kissaatitta kusanaqisut akilersorniarneqaranni ineriartortitsineq aqqutogalugu tamassuma ingerlanneqarnissaa, taamaalilluta inuuneq atugarissaarfiusoq oqartussallu aningaasaataannik sipaarfiusinnasut atulissagaluaratsigit, GA-p pisortaa, Brian Buus Pedersen taama oqarpoq.
Naalakkersuisut ingerlatsinerminni allannguutissatut siunniussaat arlalippassuusut, tunngaveqarluartumik qanorlu aningaasalersorneqarnissaannik siunnersuutinik, GA aamma maqaasisaqarpoq.
- Naalakkersuisooqatigiinnermi isumaqatigiissutaasut ilaasa atuutsinneqalinnginnerini tamakku nalilersorluarneqarnissaat inassutigissavarput. Tassami ajunnginnerpaavoq, ilisimasaqarneq aallaavigalugu aalajangiussaqarnissaq. Tassami aalajangiussassassat ilisimasaqarnermik tunngaveqanngippata, eqqoriaaneruinnassaaq inuiaqatigiinnullu akisuallaamik kinguneqaannartussaassallutik, Brian Buus Pedersen oqarpoq imalu siunnersuilluni.
- Nunatta aningaasaqarnera ilugersunartupilussuuvoq tamannalu qaangerneqassappat arlaanniit aningaasanik nassaartoqartariaqassalluni. Inuiaqatigiit iluanaaruteqartussaapput aamma ineqarnermi akit appasinnerusariaqarput soorluttaaq inuuniarneq akikinnerusariaqarluni. Taamaanngippami isumatusaarnerunngilaq annertuunik aningaasaliisoqarnissaa, soorlu Naalakkersuisut taama siunertaqartut.
Brian Buus Pedersen oqarpoq assersuutitullu taallugu, Kim Kielsenip oqalugiarnermini oqaasiisa ilaat, tassa oqarmat 'politikkikkut arlalippassuarnik siunniussaqaraanni tatiginninneq pilersinneqarsinnaanngilaq'
- Assersuutitut taalara, Nuna tamakkerlugu assigiimmik akeqartussaatitaanermik Naalakkersuisut tassanngaannartumik siunniussaat. Sooq taama siunniussaqartoqassava ilisimanngikkaanni tamanna suliffeqarfinnut illoqatigiinnullu ataasiakkaanut tamassuma qanoq iluaqutaatiginissaa ilisimanngikkaanni?
GA-p pisortaa Brian Buus Pedersen taama oqarpoq. Taassuma nunaarutigaa, sulisinnaassusermut kajuminnerunissaq Naalakkersuisut siulittaasuata ukiortaami oqalugiarnermini ilanngummagu.
