Sulisitsisut ikiorsiissutit pillugit: Pitsaavoq, kisianni piffissaq sivisuallaartoq atorneqarpoq

Naalakkersuisut killilersuusioraangamik inuussutissarsiuteqartunut taarsiissuteqarnissaq eqqarsaatigisassagaat, Sulisitsisut isumaqarput.
- Pissutsinut maanna atuuttunut atatillugu killilersuutinik atuilersitsisoqaqqippoq, aamma tassunga ikiorsiissutissat piareerneqanngillat, tamannalu noqqaassutigaarput. Killilersuinernik atuilernermik ikiorsiissutit aamma piareersimatinneqassapput, Christian Keldsen oqarpoq. Assi © : KNR
januaarip 20-at 2022 08:55

Naalakkersuisut suliffeqarfinnut, amerlanerpaamik 20-t katerissinnaaneranut killilersuineq pissutigalugu ilaatigut juullimut nereqatigiinnernik taamaatiinnarneqartunik eqqugaasunut nutaanik ikiorsiissutinik pilersitsipput.

20-mi ikiuut


Suliffeqarfiit katersuunnissamut killiliussamik siorna eqqugaava?


Taamaappat Naalakkersuisut ikiuutaannut nutaanut ’20-mi ikiuutit’-nut qinnuteqarsinnaavutit.

 

Naalakkersuisuisunit suliffeqarfinnut katerinnissamut killiliinerup nalaani aningaasanik annaasaqarsimasunut ikiuutit nutaat ikiuutinik ajornartoornermilu taarsigassarsinernik ilaqarput.
 

Naalakkersuisup ikiuutaat neriniartarfiuteqarnermi inuussutissarsiortunut, kiffartuussinermik inuussutissarsiuteqartunut, timersortarfinnut, katersortarfinnut allanullu atuupput.

Sulisitsisut ikiuutit nuannaarutigigallarpaat.

- Sulisitsisut ikiuutinik tulluartunik imaqartunik, siorna novembarimi immikkut pisoqarneranut taarsiissutaasinnaasunik peqalernera tigulluarpaat. Tamanna nuannaarutigaarput, Sulisitsisut pisortaat, Christian Keldsen oqarpoq.

Killilersuutit piffissap sivikitsup iluani kalerriutigineqartut

Inuit amerlanerpaamik 20-t katerissinnaanerannik siorna killiliineq sumiiffinni ataasiakkaani atuutsinneqarpoq.

Assersuutigalugu Nuummi piffissami novembarip ulluisa 13-iannit novembarip ulluisa 21-annut inuit amerlanerpaamik 20-usinnaatitaapput.

Killilersuinerit juullilernerani nereqatigiinnerit nalaanni pipput, neriniartarfiutillillu juullilernerani nereqatigiinnissanik taamaatitsiinnartunik mailikkut tigoqqaasussat killilersuutit ilorrisimaarutiginngilaat.

Katerinnissamut amerlanerpaamik 20-oqqusaanerat nunatta avannaani sumiiffinni arlalinni aamma atuuppoq.

- Killilersuutit piffissaq sivikitsup iluani atuutilersussat kalerriutigineqarnera ilaatigut unammillernangaatsiarpoq, piffissarlu taanna neriniartarfinnut ulapaarfiuvoq, pingaartumik amerlasuut juullernissaanut nereqatigiinnissanik pilersaaruteqarneranni aammali tusarnaartitsinissat sammisassaqartitsinerillu allat, Christian Keldsen oqarpoq.

- Taamaammat piffissap sivikitsup iluani aningaasartuutit matussuserneqarsinnaannginneranni taamaatitsiinnartariaqarput.

Ikiuutissat suliarineqarnerat sivikinnerussasoq

Aningaasartuutilli matussuserneqarnissaat maanna qinnutigineqarsinnaavoq. Naalakkersuisulli ikiorsiissutissanik suliaqarnerat sivisuallaarsimasoq, Sulisitsisut isumaqarput.

- Killilersuutinik nalunaaruteqannginnerami taarsiissuteqarnissamik aamma nalunaaruteqartoqartarnissaa Sulisitsisunit kissaatigaarput. Killilersuilernissaq tusanngikkallaratsigilli ikiorsiissutit uku missingersuutaat piareerneqareerpoq. Taamaakkaluartorli naammassinissaanut qaammatit marluk atorneqarput. Piffissaq sivisuallaarpoq, Christian Keldsen oqarpoq.

- Sulisitsisut maanna killilersuutinut tunngatillugu taarsiissuteqartoqarnissaa aamma kissaatigaat. Neriniartarfiit, imerniartarfiit assigisaallu assersuutigalugit unnukkut quliniit ullaakkut tallimat tungaanut matoqqasartussaapput. Qeqqata Kommuniani tuniluunnermut tunngatillugu immikkut ittumik mianersortoqarnera pissutigalugu imigassamik nioqquteqarneq matuneqarpoq.

- Pissutsinut maanna atuuttunut atatillugu killilersuutinik atuilersitsisoqaqqippoq, aamma tassunga ikiorsiissutissat piareerneqanngillat, tamannalu noqqaassutigaarput. Killilersuinernik atuilernermik ikiorsiissutit aamma piareersimatinneqassapput.

Sulisitsisut pisortaat oqarpoq, taassumalu Namminersorlutik Oqartussat tusarnaarluartarnerarpai, taamaakkaluartorli ikiorsiissutinik piareersinissamut piffissarujussuaq atoqqittarlugu.