Sulisitsisut ernumapput

Pujortartarneq pillugu malittarisassat nutaat ullumimiit Danmarkimi atuutilerput. Sulisitsisut annilaanngatigaat sulisutik suliassaminnik nakkutiginnikkunnaarlutik silami pujortarnerulernissaat, tamatumunnga pissutaavoq inatsit nutaaq ullumi atortuulersoq suliffiup iluani pujortaqqusiunnaarnermik kinguneqarmat.
aggustip 15-at 2007 10:57

Pujortarniarneq maanna ajornakusoornerulerpoq.

Pujortartarnermik inatsisip ullumimiit atortuulersinneqarneratigut suliffeqarfinni imerniartarfinni, neriniartarfinnilu pujortartarneq maanna inerteqqutaalerpoq.

Pujortartartut pujortartartunillu illersuisut sumiluunniit pujortarsinnaaneq illersorniarlugu aqqusinikkut unnuaq ingerlaaqatigiipput pujortaqqusiunnaarnermut akerliullutik.

-Pujortartartut ilaat aqqusinikkooqataasoq oqarpoq; imerniartarfiutillit neriniartarfiutillillu namminneq aalajangersinnaasariaqaraluaraat, imerniartarfiutiminni neriniartarfiutiminnilu pujortartoqassanersoq, pujortartoqassannginnersorluunniit.

Piviusorli tassaavoq siunissami pujortartartut suliffimmi silataani pujortartalertussanngornerat.

Tamannalu suliffeqarfiit ilaasa akisunaartussanngor paat sulisummi pujortaguttut aneqqaarlutik aatsaat pujortagunnertik qaangerniartartussanngormassuk.

Tamannalu Danmarkimi Sulisitsisut Peqatigiiffiannit iluarineqanngilaq.

Sulisitsisut Peqatigiiffiani atorfinitsitsisarnermut inatsisinik ilisimasalik oqarpoq, sulisoq suliani najoqqutaralugit akilerneqartartoq, taamaattumik sulisuusup kialuunniit suliani pitsaasumik ingerlattussaavaa aniaqattaarani.

Pujortartartut ilaata oqaatigaa, ullormut pujortartarnerminut nalunaaquttap akunnera ataaseq atortarlugu. Oqarporlu pujortartarnini pissutigalugu nalunaaquttap akunnera ataaseq, ilaanni marluk, sulinerusariaqartarluni.

Kalaallit Nunaanni pujortartarnermik politikip sukannernerulernera ukiuni kingullermi aamma ersarissorujussuuvoq. Namminersornerullutik Oqartussat allaffeqarfiini januaarip aallaqqaataaniit pujortartarneq inerteqqutaalerpoq. Dronning Ingridip Napparsimmavissuani uninngasut pujortartarfianni pujortartarneq januaarip aallaqqaataaniit 2008-mi inerteqqutaalissaaq, tamatuma kingorna aatsaat silamut anilluni pujortartoqarsinnaalissaaq.