Sulisitsisut akisussaaffeqarnerulissapput

Sulisitsisut piumassuseqarluarnissaat apeqqutaalluinnarpoq nunaqavissunik ilinniartitsisalernissaq sulisoqarnerulernissarlu anguneqassappat, SIK-ip siulittaasua Jess. G Berthelsen oqarpoq.

Inatsit nutaaq ukiortaamiit atuutilersussaq nunatsinni ilinniarsimanngitsut suliffigisinnaasaannut atorfinnullu nunatsinni ilinniarneqarsinnaasunut sunniuteqartussaavoq.

Inatsilli iluatsilluassappat sulisitsisut qanoq ittuuneri apeqqutaalluinnartoq Jess G Berthelsen isumaqarpoq:

Assersuutigiinnarlugu Jungep Hotel Hans Egede maani tigugamiuk annertoorujussuarmik nunaqavissunik atuilerpoq allanillu massakkut tiguneqarami takuneqarsinnaavoq kikkunnilluunniit tamanit avataaneersunik tikisitsisoqalersoq taamaattumik aamma sulisitsisoq qanoq annertutigisumik nunaqavissunik atuerusunnersoq aammalu imaassanngilaq sulisitsisoq nunaqavissunik atuinianngitsoq avataaninngaaniit tikisitsinnarsinnaasoq taanna sulisitsisunut annertuumik sulisunut politikkeqartunut pitallernertulluunniit oqaatigineqartariaqarpoq aningaasartuuteqarsimasunut sulisunut taamatut avataaninngaaniit tikisitsipalaaginnartarneq.

Sulinermik Inuutissarsiutillit Kattuffianni siulittaasup Jess G Berthelsenip qularutiginngilaa inatsisip nutaap atulerneratigut ilinniarsimanngitsut ilinniarsinnaalernissaannut iluaqutaajumaartoq. Siunnersuummi anguniagaagami avataaneersumik sulisoqarnerit tamaasa nunatsinneersumik ilinniartitsisoqartalernissaa.

Inatsisip ilusilersornerani nunatsinni sulisitsisut peqatigiiffii SIK-lu isumasiorneqarsimapput. Else Løvstrøm ilanngutassiamik suliarinnippoq.