Sulisitsisut: Aalisartut amerlavallaarput

Sulinermik Inuussutissarsiuteqartut Kattuffiata aamma Sulisitsisut Aalisarnermut Naalakkersuisup Karl Lyberthip sinerissap qanittuani qaleralittassat aappaagumiit qaammatikkaartumik agguaattalerniarlugit pilersaarutaanut tapersiipput.
decembarip 09-at 2013 07:27

SIK-mit neriuutigineqarpoq qaammatikkaartumik pisassiisoqartalerneratigut sulisartut qaammatini arlaqarnerusuni ukiumut sulisalerumaartut, Sulisitsisuniillu aaqqissuusseqqinnissaq pisariaqartutut isigineqarpoq, taakkua isumaat malillugu aalisartut pisassiissutinut naleqqiullugit amerlavallaarmata.

KNR-imi ippassigami oqaluttuaraarput avannaani aalisartut Naalakkersuisut qaammatikkaartumik pisassiisalerniarnerannut akerliusut. Maanna aalisakkanik suliffissuarni sulisut tunuliaqutaat Naalakkersuisut qaammatikkaartumik pisassiissalerniarannut tapersiillutik nalunaaruteqarput.

Aalisartut pisassiisalernissamut pilersaarummut akerliupput ilaatigut aalisartup annertunerpaamik ullunilu sivikinnerpaamik aalisapallattarnissaa ernummatigigamikku.

Kisianni tassa SIK-mit pisassat amerlassusaa allanngunnginnerat isiginiarneqarpoq:

- Uanga takusinnaanngilara aalisartunut qanoq ililluni kingunerlussanersoq. Isertitassat, tassa pisassiissutit eqqarsaatigalugit isertitassat, ukiumut taakkua isertinneqartarput. Illuatungaatigulli maannakkut taamatut aaqqissuussisoqartillugu ilaasortagut taamaallaat qaammatini arfinilinni arfineq-marlunnilu ilaatigut aningaasarsiaqartarput ukiumut. Annertuumillu taanna ilaasortatta ilaqutaasalu inuuniarnerannut sunniuteqartarpoq, SIK-p siulittaasua Jess G. Berthelsen taama oqarpoq nangillunilu:

- Taamaattumik qaammatikkaartumik pisassiissutigineqalerpat SIK-p upperaa aalisakkerivinni sulisut ilaasortagut aalaakkaanerusumik sulisinnaalissasut, allaat neriuutigalugu ukioq kaajallallugu sulisinnaalissasut. Taannalu ilaasortatsinnut annertoorujussuarmik pingaaruteqarpoq. Tassaniinnaanngilaq. Aamma kommuunit Namminersorlutik Oqartussallu annertuumik sipaaruteqassapput. Taamaattumik pitsaasutuinnaq uanga SIK-p tungaaninngaanniit nalilerpara, Jess G. Berthelsen oqarpoq.

Sulisitsisut tungaannit pisassiissutit qaammatikkaartumik agguaanneqartalernissaannut pilersaarutinut aamma tapersiipput. Taakkuami isumaqarput aalisartut aalisagartassiissutit eqqarsaatigalugit amerlavallaartut:

- Taamatut aaqqissuusseqqinniarneq allatulli ajunngilaq. Isumaqarpunga aamma pisariaqartoq aalisagartassat eqqarsaatigalugit aalisartut amerlavallaarmata. Taamaattumik aaqqissuusseqqinniarneq pisariaqarpoq, isumaqarpungalu qaammammoortumik pisassiisalernissaq ajunngilluinnartoq, Henrik Leth, aalisarneq aammalu nunanut allanut niuernermi Sulisitsisut ataatsimiititaliaanni siulittaasoq oqarpoq.

Henrik Lethilli Karl Lyberthi kaammattorpaa sumiiffinni ataasiakkaani eqaatsumik iluarsiisarnissaanut kaammattorpaa:

- Eqaatsumik aaqqiinissarnissaq sumiiffinni pissutsit eqqarsaatigalugit eqqumaffigineqaruni ajunngilaq. Assersuutigalugumi soorlu Kullorsuarmi ukiukkuinnaq aalisartoqartarpoq. Taamaammat uggornassaaq aalisartariaasertik atorlugu aalisartarunnaassappata qaammmammut pisassiissutit eqqunneqarnerisigut. Kisianni tassa ilimagilluinnarpara Karl Lyberthip  sumiiffinni pissutsit aallaavigalugit eqaatsuik iluarsiisinnaassasoq, Henrik Leth oqarpoq.