Sulisinnaasut ikinnerusunik ikiorsiissuteqartikkusukkai
Nunatsinni inuit 2100-nit amerlanerusut suliffissarsiortutut nalunaarsorneqarput, taakkunanngalu 1200-t missaanniittut sulinissaminnut piareersimallutik.
Tassalu suliffeqanngitsut isumaginninnikkut pisartaagaasigut eqqorneqarsinnaanerannut sakkussaqartariaqarpugut. Avannaata Kommuneriligassaanut borgmesteriulersussap Nalakkersuisunut taama ersaritsigisumik oqaatigaa:
- Sulisinnaasoq suliumanngippat, taava arlaatigut inatsisitigut pisartagaasigut eqqorneqarsinnaaneranik sakkortunerusunik sakkussanik peqartariaqarpugut, borgmesterinngortussaq, Palle Jerimiassen oqarpoq.
Illoqarfinni Avannaata Kommunissaaniittussani inuit 178-it sulilernissamut piareersimagaluarlutik suliffeqanngillat.
- Avannaata Kommuniani sulisussanik massakkut annertuumik amigaateqarpugut. Avataaninngaanniit sulisussanik tikisitsisarneq ingerlapparput. Ajoraluartumik. Nalunngikkaluarlugu illuatungaani sulisinnaassutsimikkut piareersimasunik peqaraluarluta, Palle Jerimiassen oqarpoq.
Qaasuitsup Kommunianiinnaq Kinamiut 38-t Royal Greenlandip suliffeqarfissuinut sulisussatut tikisinneqarput.
Nunatsinnilu suliffissaaleqisoqartillugu nunanit allanit sulisussarsiortoqartariaqarpat, tamanna aaqqissuussaanikkut ajornartorsiornermik ersarissumik takutitsisoq, Aningaasaqarnermut Siunnersuisoqatigiit nalunaarusiaminni nutaami allaaseraat. Akissarsiutigalugu sulinerup iluanaarutai naammanngitsut taakku inerniliipput.
Aamma sulinerup ikiorserneqarnermit pilerinarsarneqarnerunissaa siunnersuisoqatigiit inassutigaat. Pisortallu ikiorsiissutinik tunniussisarnerup amerliartortillugit piumasaqaateqarneruleriartortoqartariaqartoq, siunnersuisoqatigiit inaassutigaat.
Palle Jerimiassenilu assinganik isumaqarpoq.
- Sulisitsiniarnermut inatsit aammalu isumaginninnermut inatsit taakkua isigineqartariaqarput, imminnullu tulluussarlugit aaqqissuullugit. Imaassanngimmat, sulisinnaannginnama taava socialimukarlunga tassanngaanniit pissarsiussaanga, Avannaata Kommunianut ikaarsaariarnermut ataatsimiititaliami siulittaasoq, Palle Jerimiassen oqarpoq.
