Sulisartut ulluat

Nuummi Sulisartut ulluanni ingerlaaqatigiinnermi inuit 200-t missaanniittut oqalugiartoqarnerani nuannallutik nilliasarput ersaattaattarlutillu. Tusarnaartut akornanniippoq Jakobine Høyer, sulisartut ullorsiornerannik pingaartitsilluni peqataasoq.

Ulloq pingaartippaa takutitsiffiusarmat sulisartut aningaasarsiaat pitsaanngitsut atugarisaallu iluarsisassat amerlasuujummata. Sulisartullu ullorsiornerannut peqataanermigut ikiuutaalluni misigisimavoq, pitsanngorsartariaqartullu amerlanerarpai.

-Aningaasarsiat tungaatigut sulisartut malinnaanngillat, soorlu niuertarfinni pisiassat qaffakkaluttuinnartut, taamaalillutillu sulisartut malinnaatinneqanngiivillutik, Jakobine Høyer oqarpoq.

SIK-p siulittaasuata Jess G. Berthelsen-ip oqalugiarnermini pingaarnersatut oqaatigaa namminersortunngorsaanerup siunertaminut iluatsinngitsoornera. Namminersortunngorsaanerup kingunerisussaagaluarpaa aningaasarsiat pisissutigineqarsinnaanerat pitsanngortinneqarnissaat kiffartuunneqarnerput sivisunerulissasoq, suliffissaaleqinerlu annikilleriassasoq, tamakkuli pinngitsut Jess G. Berthelsenip oqaatigaa.

-Namminersortunngorsaaneq sulisartunut pitsaanngitsumik kinguneqarsimavoq. Ilaasortagut suliffissaaleqisut amerlanerulersimapput, aningaasarsiaat pisissutigineqarsinnaasut pitsaanerulersimanngillat, taavalu avammut niuernerput pitsaanerulersimanani. Tamakkuuppullu aaqqiivigineqartariaqartut, Jess G- Berthelsen oqarpoq.

Jess G. Berthelsen-ip oqalugiarnermini aamma inatsisartunut ilaasortat sakkortuumik uparuarpai, saniatigooriinnarlugu nunarput sullimmassuk, SIK-millu piumasarineqarpoq nunarput ukioq naallugu inatsisartunit sullinneqartalernissaa.