Sulisartut piitsunngoriartorput

Sulisartut ilinniagaqarsimanngitsut ukiut qulit kingulliit ingerlaneranni piitsuunerulersimapput. Tamanna ilaatigut takuneqarsinnaavoq, suliamik ilinniagaqarsimanngitsut akissarsiaasa ukiuni kingullerni qaffakkiartornerat nioqqutissat akiisa qaffakkiartornerannut sanilliukkaanni.
Allattoq Louise M. Kleemann
juunip 24-at 2008 06:35

Nioqqutissat akii 1998-imiit 2008-mut agguaqatigiissillugu ukiumut 2,5 procentimik qaffariarsimapput. Suliamilli ilinniagaqarsimanngitsut akissarsiaat piffissami tamatumani agguaqatigiissillugu taamaallaat 2 procentimik qaffariarsimapput.

Tamatuma kinguneraa, suliamik ilinniagaqarsimanngitsut ullumikkut pisisinnaassusiat ukiut qulit matuma siornagumut sanilliullugu 5 procentimik appasinnerummat.

Sulinermik ilinniagaqarsimanngitsut pillugit isumaqatigiissut, ruujorilerilerinermi, namminersortuni innaallagiaqarnermilu suliaqartunut tunngasoq, Sulinermut Inuussutissarsiuteqartut Kattuffiata Sulisitsisullu Kattuffia atsiugaat, assersuummi tunngavigineqarpoq.

Suliamik ilinniagaqarsimanngitsoq ullumikkut 2008-mi nalunaaquttap akunneranut 73 koruunit 71 ørimik akissarsiaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq