Sulisartut piginnaanngorsarnissaat aqqutissiuunnialerpaat

Namminersornerup tungaanut sulinermik inuussutissarsiutilinnik pikkorissutsikkut piorsaanissaq SIK-p piareersalerpaa.

Tamanna anguniarlugu namminersornermut inuussutissarsiornermullu pisortaqarfiit SIK-p ullumi atsioqatigalugit isumaqatigiissuteqarfigai.

Taakku pingasuullutik misissorniarpaat SIK-p ilaasortai qanoq ilillutik ilinniaqqinnissamut pitsaanerusumik periarfissarsiuunneqarsinnaanersut, SIK-p siulittaasua Jess G. Berthelsen ilisimatitsivoq.

- Sulisartut ilinniaqqinnissamut periarfissaat pitsaappata nunatta aningaasarsiornikkut imminut napatissinnaanera taamalu naminersulernissaq qularnaannerussaput, Jess G. Berthelsen oqarpoq.

Periarfissallu qulaajarneqarnissaat tullinnguuppoq.

SIK ilaasortami akornanni isumasiueqqammerpoq, aningaasarsiat, ilinniaqqissinnaaneq suliffimmilu oqaatsit atorneqarnerat pillugit paasiniaalluni. Akissutit 3000-iusut pisortaqarfinni misissorneqassapput, taakkulu tunngavigalugit pilersaarusiortoqassaaq.