Sulisartut oqartussaaqataanerulerusupput
Politikerit kisimik ineriartornermi oqallinnermik ingerlatsinerunerat tamat oqartussaaqataanerannut akorngutaasinnaasoq SIK-p siulittaasuata tullia Josef Therkelsen isumaqarpoq. Assersuutigalugulu kaammattuivoq sulisartut inuillu allat ineriartornermi oqalliseqataanerusariaqartut, soorlu namminerulernissaq, kommunillu siunissaat eqqarsaatigalugit.
Sapaatip akunnerani sulisartut kattuffii nunani avannarlerneersut, nunatsinni nunanillu avannarlerni tamat oqartussaaqataanerat qulequtaralugu Nuummi oqaluuseqarput.
Unnugulu arfineq marluniit kikkunnut tamanut ammasumik kulturikkut illorsuarmi katuami tamat oqartussaaqataanerat pillugu oqallittoqassalluni. Oqallinnermi allarniisussat tassaput SIK-p siulittaasua Jess G Berthelsen, suliniaqatigiiffik naamminermiit Franz Heilmann, taavalu Namminersorneq pillugu pisortaqarfimmiit Tida Ravn oqalugiaqqaasallutik.
