Sulisartut avataaneersut tikerarnerat Partii Naleqqap unikaallatsinniarpaa
. Partiip siullittaasua Hans Enoksen, Partii Siumut sinnerlugu naalakkersuisunut siulittaasuuvoq, Partii Naleqqallu siulittaasuata tullia Per Rosing-Petersen Siumut sinnerlu inatsisartuni ilaasortaanikuuvoq.
Taakkua oqalliffimmi aperineqarput inatsisartuni taamatullu naalakkersuisuni ilaasortaanermi naalaani siunnersuutigisimannginneraat, Partiip Naleqqap siulittaasuata tullia ima oqarpoq.
- Ineriartorneq ingerlaannavippoq aamma inuttut inerikkiartortarpugut – aamma partii inerikkiartortarpoq , Per Rosing-Petersen oqarpoq, - Partiimi ilaasortaaguit isumassarsiaqaruillu angorusuttanik partiimi kisimiilutik anguniarsinnaanngilatit, Per Rosing-Petersen oqarpoq.
Hans Enoksen taamani Naalakkersuisuni siulittaasuuvoq taamanilu partii sinnerlugu iliuuseqarsimasinnaasoq – oqalliffimmi apeqqutigineqarmat, siulittaasup tullia Per Rosing-Petersen ima akivoq.
- Aap taamani pisut allaapput. Maannakkut paasissutissanik nutaanik peqalernikuuvugut aamma piffiit nutaat atuupput. Partiitut nutaatut, partii Siumut aamma partii allat pisuutinniassanngilagut suliaqarsimannginnerarlugit Per Rosing-Petersen oqarpoq.
Partiip nutaap siulittaasua aamma aningaasartuutikillisaarusuppoq.
Allaffissorneq, maanna marloqiusamik ingerlanneqartoq, nunatsinnut naleqqussarneqartariaqartoq, Partii Naleqqap siulittaasua Hans Enoksen oqarpoq, -
- Akikillisaasoqartariaqarpoq, tapiissutit annertuut akissaqarfiginngilagut, taamaattumik allaffissorneq inunnut 56.000nut naleqqussarneqartariaqarpoq, imaanngilaq inuit 5 millionit periusiat atorlugu nuna ingerlanneqassasoq - suna tamaat marloriaammik ingerlatsisunngorlugu - uani pineqarlutik Namminersorlutik Oqartussat – kommunit aamma suliffeqarfiit Namminersorlutik Oqartussanit ingerlanneqartut – taakkunnnga allafissornerit milliard koruunit atorneqarput – Partii Naleqqap siulittaasua Hans Enoksen oqalliffimmi taama oqarpoq.