Sulisartut avataaneersut ikilisinniarneqarput

Ukiamut inatsisartut inatsisissatut siunnersuut akuersaassappassuk avataaniit suliartortartut killilersimaarneqalissapput, ingammillu neriniartarfinni sanaartornermilu kalaallit sulisorineqarnerulissapput.

Nuummi arfininngornikkut unnukkut pizzatorniaraanni imaluunniit nipilersortulimmi qitinniaraanni takornartaanngilaq tuluttuinnaq oqaluttumit kiffartuunneqarnissaq. Ukiunimi kingullerni amerligaluttuinnartut ilaatigut Polenimiut, Rumaniamiut Canadamiullu sulisorineqartarlersimagamik.

Suliffeqarfiit avataaneersunik sulisoqarluartut ilagaat Hotel Godthåb. Tassani rumaniamiut qulinngiluat matulerisutut, nipilersortutut kiisalu bowlingertarfimmilu pizzaarniartutut suligamik.

Siunissamili Namminersornerullutik Oqartussat avataaniit suliartortartut kalaallinit taarsersorniarpaat. Inuutissarsiornermut Pisortaqarfiup suliniuteqarneratigut avataaneersut nunatsinni sulinerminni nunatsinneersumik ilinniartoqartarnissaat qulakkeerneqalerpoq.

Inatsit nutaaq pillugu Inuutissarsiornermut naalakkersuisoq Johan Lund Olsen ima nassuiaateqarpoq:

- Allannguutissami uani kommunit piginnaatitaalerput piumasaqaateqarsinnaanngortillugit akuersissummik tunniussisussaagaangamik taava aamma piumasaqaatigisinnaalissavaat ilissi suliffeqarfimmi maani aatsaat akuerineqassaasi ilinniarfinnik aatsaat pilersitsisinnaagussi taamaalillutaana avataaniit suliartortartut siunissaq ungasinnerusoq isigalugu taakkua ikilisarniarigut.

Kisianni aamma ataqatigiissaarisoqassaaq maani nunatsinni sulisut piginnaasaasa ineriartortinnissaa taanna siunertaalluni.

Kommunini inuutissarsiutillit peqatigiiffii assigiinngitsut inuttaralugit kommuninut siunnersuisartutut ataatsimiitsitaliortoqassasoq Johan Lund Olsen aamma oqarpoq.