Sulisartut aningaasanik annaasaqarsinnaapput

Inuttut ataasiakkaatut atorfeqartinneqarnermi isumaqatigiissuteqartarneq, suliffeqarfippassuit ukiuni kingullerni atugarilerpaat. Taamatut ineriartortoqarnera pillugu SIK ilaasortaminik mianersoqqussivoq. SIK-p siulittaasua Jess G Berthelsen ima oqarpoq:

- Ilaasortat immikkut ittumik isumaqatigiissuteqarsimasut, ilaatigut qaangiuttoornernut, pensioninut nalliuttunullu tapit ilanngullugit isumaqatigiissutiginissaat. Ajoraluartumik ilaatigut tamakkua qularnaarneqarneq ajorsimapput. Taamaammat SIK-minngaanniit kajumissaarutigissavarput, taamatut immikkut ittumik isumaqatigiissuteqarnissami SIK-mut immikkoortortaqarfimmulluunniit saaffiginneqqaartarnissaq, Jess.G. Berthelsen oqarpoq nangillunilu: - Taamatut isumaqatigiissuteqartartut amerliartortut maluginiarsimavarput. Aamma immaqa aningaasarsiat amerlisutut isikkoqaraluartoq, tapit assigiinngitsut mininneqarsimagaangata, akissarsiat malugineqanngitsumik annikilleriartarput. Aamma puigorneqassanngilaq soraarnermusiaqalernissamut isumaqatigiissuteqarnissaq, taamaaliunngikkaannimi 63-iliilluni soraarninngoraanni aatsaallu paasillugu aningaasanik annaasaqarsimalluni, tamanna uggornassaaq. Kisianni sulisitsisoq soraarnermusiassanut akiliisarsimanngikkuni aamma kingumoortumik malersorneqarsinnaavoq, aningaasarpassuarnillu akiliisinneqarsinnaalluni.

Taama oqarpoq SIK-p siulittaasua Jess G Berthelsen.

Sulisartut inuttut ataasiakkaatut atorfeqartinneqarnermi isumaqatigiissuteqarsimaneranni pitsaavallaanngitsumik isumaqatigiissuteqarsimagaangata, soraarsitaanermi SIK-mit ikiorneqarsinnaanerat ajornakusoorsinnaasartoq, Jess G Berthelsen aamma oqarpoq.