Sulisartut angerlartinneqartut amerleriarput
Halibut Greenlandimit sulisut 20-t ullumikkut angerlartinneqartut qalerallit tunisaajunnaarmata misiliutigalugu qeeqqanik suluppaakkanillu tigooraaleraluarnermi sulisorineqaraluarput. Qeeqqanilli suluppaakkanillu tigooraneq suliffeqarfimmut akilersinnaanngitsumik ingerlammat sulisunik ikilisaasoqalerpoq:
- Qalerallit tunisaanerisa ulluannit kingullermit taakkua aalisakkat tigooraleraluarpagut. Kisianni sapaatip akunnerani tigooraanitsinnit paasivarput tulaanneqartartut ikippallaarnerat pissutigalugu suliffeqarfimmut akilersinnaanngitsoq. Sulisullu sinnerussimagaluartut tamangajaasa suliunnaartikkallarneqarput,Halibut Greenlandimi tunisassiornermut pisortaq, Ane Geisler, oqarpoq.
Qalerallit tunisaajunnaarnerannit maannalu qeeqqat suluppaakkallu tunisaajunnaarneranni Halibut Greenlandimi sulisut katillugit 41-t angerlartinneqarput.
Aalisarnermut Naalakkersuisoq Qanoruumi apersorneqarnermini ippassaq oqarpoq, avannaani tunisassiorfiit qaleralinnik tuniseqqusinnginnerup nalaani tunisassiassanik allanik nassaarniarnissaannut Naalakkersuisoqarfimminit kaammattorsimallugit. Kisiannili tassa maannakkut paasinarsivoq Naalakkersuisup kaammattuinera Halibut Greenlandimut akilersinnaangitsumik ingerlasoq.
Qullukkanik nunatta iluani tunisassiortoq, Rodebay Fish, Qeqertarsuup Tunuani qaleralinniarnerup decembarip aallaqqaataata tungaanut unitsinneqarnerani eqqorneqartunut aamma ilaavoq.
Rodebay Fish novembarip qaammataaniit marsip naaneranut qaleralinnik qullikkiorluni tunisassiortarpoq. Qaleralinniarnerulli decembarip aallaqqaataata tungaanut unitsinneqarnerani qullukkiassanik pisiortunngitsoorpoq:
Akitigut unammillerneq taanna malunniutigaatsiareernikuungami siornatigut. Taavalu 200 tonsiinnammata uatsinnut tunisisussat ikittuaraassallutik,Lars Fleischer Rodebay Fish-imi pisortaq oqarpoq.
Oqaatsuni qullukkanik tunisassiorfiup neriuutigigaluarpaa Qeqertarsuup Tunuani qaleralinniarneq decembarip aallaqqaataani ammaqqinneqarpat qaleralinnik 30 tons-inik ukiup naanissaanut qullukkiornissamut atorsinnaasaminnik pisisinnaanissartik. Taamaattorli ukiup naanissaanut qaleralittassani 200 tons-it kiserngorummata tunisassiorfiup pisortaata qularivaa 30 tonsinik pisisinnaanissartik. Tassami tunitsiviit allat Rodebay Fishimit akigissaartitsinerummata.
Aalisarnermut Naalakkersuisup Qanoruumi ippassaq apersorneqarnermini ilanngullu oqaatigaa qaleralinnik qullukkiornermut atorneqarsinnaasunik pisasseeqqittorsinnaanersoq misissorneqaleruttortoq.
Rodebay Fishimi saarullinnik panertiterineq ulluni makkuni ingerlanneqarpoq. Sulisut tallimat Oqaatsuni sulisorineqartut, Ilimanami marluk sulisorineqarput.
Royal Greenlandimit nalunaarutigineqarpoq qeeqqat, suluppaakkat, uukkat aamma tupissutit annikikkaluamik tunisaammata tunisassiorfiit suli ammatinneqartut.
