Sulisartut akissarsiorfissaqarnerulissapput
Nunami suliffippassuarnik pilersitsinerit nunatsinni sungiusimaneqanngillat. Ullumikkummi kilisaataatillit pinngitsaaliissummik aalisakkanik raajanillu nunamut tulaassuitinneqartarput nunami suliffissaqartitsinissaq qulakkeerniarlugu.
Tamanna illuanut saatinneqarsinnaalissaaq Alcoa aatsitassarsiorfiillu sinerissami pilersiorneqalerpata, tassami aalisarnermik ingerlatsisut aalisakkat raajallu iluanaarutiginerulersinnaalissammassuk.
Aalisarnermut naalakkersuisoq Finn Karlsen aperaarput siunissami tunisassiorfiit matorarniarnerai, ingammik Alcoa assigisaallu suliffinnik pilersitsiortorpata.
Finn Karlsen oqarpoq naalakkersuisut periarfissaq nutaaq tamanna suli eqqartornikuunngikkaat. Nassuerutigaali kilisaataatillit qularutissaanngitsumik aningaasarsiornerulissasut pinngitsaaliissummik nunamut tulaassisussaatitaanerit taamaatinneqassappata.
Aammali sinerissap qanittuani aalisartut nammineerlutik pisaminnik toqqaannartumik avammut tuniniaasinnaanerat periarfissagissaarnerulissasoq qularutiginngilaa:
”Tamanna ilutigalugu aalisartut aningaasarsiornerat pitsanngorsarneqarsinnaavoq toqqaannartumik avammut tunisisinnaanerat ammaallugu tassa sulisut suliffissuarni amigaatigineqalernissaat ilimanarsinnaammat akissarsiorfiusinnaasunut nuukkiartuarnissaat eqqarsaatigalugu sulisorparujussuimmi amigaatigineqalertussaapput sinerissami aatsitassarsiorfiillu Alcoakullu aallartippata.”
Finn Karlsen aamma oqarpoq periarfissat tamakkua pillugit naalakkersuisuni eqqartueqataanissamut kinguarsimaarniarnani.
