Sulisartut aalisarnermut saakkallarsinnaarusupput
Tamanna aamma kommuunip ikiorsiissutigisartagaanut apparsaaqataasinnaassangaluartoq, Upernavimmi inuussutissarsiornermut siunnersuisooqatigiit piffissami killilimmi akuersissutinik tunniussisoqartalernissaanut Inatsisartut aalisarnermut ataatsimiisitaliaanut siunnersuuteqartut isumaqarput.
- Sikusartuni qangalili ileqquuvoq sulisartut suliassaarukkaangamik sikunera pissutigalugu aalisartunngortartut. Taava ukiuunerani aalisarneq nappatigalugu. Kisianni pisassiissutit eqqunneqarneranniit ajornarsinikuuvoq nunap qaani sulisartuugaanni qaleralinnik tunisisinnaaneq. Allatut ajornartumik taava inatsisit allanngortittariaqarnerannik siunnersuuteqarluta misissuisitsillutalu pivugut, Gerth Jacobsen, Upernavimmi inuussutissarsiornermik siunnersuisooqatigiit siulittaasuat oqarpoq.
Siunnersuisooqatigiit aalisarnermut akuersissutit sulisartut januaarimiit aapriili ilanngullugu tunineqarsinnaanerat siunnersuutigaat:
- Taava piffissami tassani, ilaannikkut qaammatini sisamaasinnaasuni, nammineq imminnut napatissinnaanissaat periarfissikkumallugit - pisartagaannarnik inuutinniarnagit, kisianni aamma inuttut naleqassuseqarlutik nammineq imminnut ilaquttatillu napatissinnaallugit siunnersuut sanasimavarput, Gerth Jacobsen oqarpoq.
Upernavimmi inuussutissarsiornermut siunnersuisooqatigiit siunnersuutaat sulisartumit, Erneq Kristiansenimit, taperserneqarpoq. Taanna svejserisutut suliffimminit ukiut tamaasa ukiuunerani suliassaarunnermini angerlartinneqartarpoq. Siornatigullu aalisarnermut saattarsimagaluarpoq. Taamaalilluni imminut ilaquttaminullu pilersuinini ingerlatiinnarsinnaasarsimallugu:
- Taamanikkut kvotit licensillu atunngikkallarmata tunisisinnaavugut, nammineersinnaavugut immitsinnut uummatippugut. Taama oqarsinnaavunga. Kisianni maanna ajornaavikkami. Allaat inuttut nakkarnartorujuulluni uagutsinnut. Sociaalimut saaffiginninneq. Uffa nammineq pisinnaalluta nukeqarluta. Taanna ajulaarpoq, Erneq Kristiansen oqarpoq.
Upernavimmi inuussutissarsiornermut siunnersuisooqatigiit sulisartut 5 tonsimik pisassinneqartarsinnaanerat siunnersuutigaat, taakkualu pisassat ataasiakalaartumik iluanaarutigalugit tunineqarsinnaassanngitsut aamma siunnersuutigalugu. Taamaalilluni sulisartut 30-iniit 50-it tungaanut ukiuunerani angerlartinneqartartut aalisarnermi tunisamikkut ukiuunerani pilersorsinnaaniassammata:
- Maanna tassa allatut ajornartumik kommuuniinnaqqinnaamik inuuniarsarivugut. Ajoraluartumik, Erneq Kristiansen oqarpoq.
Upernavimmi Nunattalu avannaani sikusartumi, sulisartut ukiuunerani suliassaarunnertik pissutigalugu angerlartiinnarneqartartut, sikumi aalisalertarnerat ukiorpassuarni ileqquuvoq. Soorlu talittarfinni sanaartornerullu iluani sulisartut aalisarnermik ukiuunerani inuussutissarsiuteqarallartarnikuupput.
