Suliniutit Norgep taamaatiinnarpai

Danmarkimi suliffeqarfik Dong Energy suliniummi ataatsimi peqataagaluarpoq – tassa Norgep Kujataani Mongstadimi nukissiorfimmik kiassaateqarfiusumik pilersitsinissamut.

Maanna avatangiisit pillugit suliniaqatigiiffiup Bellonap kiassaateqarfissap taamaatinneqarnissaa piumasaraa, tamatumunnga pissutaavoq naalakkersuisut suliffeqarfinnut nukissiorfiusunut isumaqatigiissumminni ukiumut CO2-mik 100.000 tonsimik toqqorterisoqartarnissaa taasimammassuk.

Tamatuma peqatigisaanik Amerikamiut suliniut nutaaq miliardikkaanik nalilik aallartissimavaat, tassani pineqarluni aamarsuarnik nukissiorfik CO2-mik aniatitsiffiunngitsoq.

Taanna nunarsuatsinni aamarsuarsiorfiit innaallagissiorfiillu annerit aqqaneq-marluusut suleqatigiissutigaat, taasimallugulu Futuregen Alliance, Ingeniøren allappoq.

Taamaattorli suliniut ilimagisamit akisuneruallaarnera pissutigalugu pingaartinneqarunnaarpoq. Naak Amerikamiut præsidentiata George Buship pilersaarutip piviusunngortinneqarnissaa suliffeqarfinnut piumasarigaluaraa.

Suliniutilli manna tikillugu 9 miliardinik akeqartussatut oqaatigineqartup Amerikami naalakkersuisut 74 procentimik akiliisussaagaluartut nangaatilersimavai.

Teknikkikkut iliuuseriniagaq tassaagaluarpoq aamarsuit ikuallanneqannginnerini CO2 piiaarneqartassasoq nunamullu matoorunneqarluni.