Suliniutit matuneqaqqajaasut annaanneqarput
- Isumaginninnikkut suliniutit Kofoeds Skolemit Kalaallit Illuutaannillu ingerlanneqartut satspuljemit aalajangersimasumik aningaasalersorneqartalernissaattut isikkoqalernerat nuannaarutigaara, Johan Lund Olsen ullumi ataatsimeeqateqarnermi kingorna KNR-imut oqarpoq.
Aningaasaliissutit ataavartussat matumani aamma pineqarput, oqarpoq nangillunilu:
- Ukiuni kingullerni arlaqartuni ajornartorsiutaasarsimasoq tassaavoq Danmarkimi isumaginninnikkut immikkut suliniutaasartut Kofoeds Skolep Kalaallit Illuutaasalu ataanni ingerlanneqartartut ataavartumik aningaasalersugaasarsimannginnerat, tamatumalu qulakkeerneqarnissaa maanna neriunartupilussuanngorpoq.
Doris Jakobsen (S) Johan Lund Olsenilu aningaasanut inatsisissatut siunnersuut pillugu oqallinnermut Folketingillu ataatsimiinnerata ammarneqarneranut atatillugu satspuljemit aningaasaliissutaasatut januaarip aallaqqaataani unitsinneqassappata suliniutit annaanniarlugit ukiumoortumik 4 mio. koruuninik aalajangersimasumik aningaasaliiffigineqarnissaannik ujartuisimapput.
Suliniutillu taakku ilagaat ornittagaq Qiperoq Vesterbromiittoq, KNR-ilu tassunga sianermat nutaarsiassaq tusagartik nuannaarutigisupilussuuaat.
- Uummaa! Qangamita taama nuannertigisumik tusagaqarama. Nuanneqaaq. Ingerlaqqissinnaanngorpugut, ornittakkami aqutsisoq Ane Louise Lynge nuannaaqaluni oqarpoq.
Qiperoq decembarip 31-iani matusussanngorlugu piareersarluni aallartittoqareersimagaluarpoq, aningaasaliiffigeqqinneqarnermikkulli pisarnermisut ingerlaannarnissartik maanna qulakkeerlugu oqaatigaa.
IA-p aningaasanut inatsisissap isumaqatiginninniutigineqarneranut atatillugu pitsanngorsaatissanut aningaasaliisoqanngippat, ilaatigut isumaginninnermut suliniutinut 4 mio. koruuninik aningaasaliisoqanngippat, aningaasanut inatsisissaq itigartillugu taaseqataaniarlulu oqaatigisimavaa. Isumaginninnermulli ministeriaqarfiup nalunaarutaata tamanna allanngortissaneraa maannangaaq oqaatigissallugu siusippallaartoq Johan Lund Olsenip oqaatigaa, taassumami aamma pinerluuteqarsimasunik isumaginnittoqarfimmut eqqartuussiveqarnermullu tunngatillugu pitsanngorsaasoqarnissaa kissaatigigamiuk.
