Suliniutit annertuut pillugit inatsissami akikitsunik sulisoqalersinnaanerup pakkersimaarneqarnissaa qulakkeerneqanngilaq
Siumukkormiulli namminneq inatsisiliariniagaat nunat allamiunit atornerlunneqariaannaavoq, sulisunillu akikippallaanik sulisoqarsinnaanissaat suli periarfissaalluni. Taama aviisi ullormut saqqummersartoq Dagbladet information allaaserisaqarpoq.
Inatsisilerituut sulinermillu inuutissarsiuteqartut kattuffii arlallit inatsisissaq sukumiisumik atuareerlugu taama inerniliisuupput.
- Inatsisisamut siunnersuut malissagaanni aningaasarsiatigut atugassarisatigullu periarfissalutsitsinissamut ammaassisupilussuupput, Lars Lyngse, 3F-imi qullersanut siunnersuisartuusoq aviisimut taama oqarpoq imalu nangilluni:
- Inatsisissamut siunnersuut atuaqqaarlugu ajunngikkaluaqaaq – tassami inuit tunngaviusumik pisinnaatitaaffii allallu tassani akuersaarneqarput. Inatsisissarlu atuarluaraanni aporfissarpassuaqarpoq, siunertarisallu kusanaraluaqisut qulakkeerneqarsimanatik.
Inatsisissarmi malillugu maani nunaqavissut akunnermusiarisartagaasa minnerpaaffissaat ataannagu akissarsiaqartinneqarlutik sulisoqarsinnaassapput. Taannali inatsisissami kisiartaalluni qulakkeerneqarsimavoq, sulisullu nunat allamiut kalaallinut atugassarititaasunit ajornerusumik atugassaqartinneqannginnissaat qulakkeerneqarsimanngitsoq 3F-imit tikkuartuunneqarluni.
Aamma LO assigukannersumik isummersuuteqarpoq inatsisissamilu qanoq sivisutigisumik sulisoqartarnissaa, qaangiutttoornermusiaqartinneqarnissarlu qulakkeerneqarsimanngitsoq, Lizette Risgaard, LO-mi siulittaasup tulliata aviisi Informationen-imut tikkuartuullugu.
- Pissutsit taamaattut atuutsillugit Kalaallit nunaanni suliffeqarniarnermut ajoqutaassaqaaq, Lizette Risgaard oqarpoq.
Taamaammat akikippallaamik sulisoqartalersinnaanissamik inatsisissaq kinguneqarsinnaasup Nunatsinni sulinermik inuutissarsiuteqartut kattuffiisa akerliuffigissagaat Lizette Risgaardip neriuutigiinnarnerarpaa.
Inatsisissarli SIK-mit suli isummerfigineqarsimanngilaq. Inatsisissallu tusarniaassutigineqarneranut piffissaliussaq tallimanngorpamut killeqarluni.
