Suliniutit angisuut pillugit oqallinneq Nunanut avannarlernut siaruaappoq
Nunatsinni piiavinnik angisuunik sanaartornermut atatillugu sulisunut ajornerusumik atugaqartitsinissap akuerineqarneratut isigineqartoq, aamma nunani avannarlerni sanilerisatsinni ernumanartoqartinneqarpoq.
- Pissutsit, kalaallit kissaateqarnerat malillugu naalakkersuisuinit maannakkorpiaq saqqummiussassatut piareersagaat, Folketingip allamiut pillugit politikkikkut immikkut inatsisiliorneragut aqqutissiuunniarneqarput.
Nunat Avannarliit Siunnersuisoqatigiivini, allaat socialdemokraatinit tamanna akerlerineqarpoq.
- Sulisartut nunanit allaneersut Kalaallit Nunaanni periarfissat pisinnaatitaaffiillu atuuttut assinginik atugassaqartinneqassapput. Tamannalu pinngippat, ajornerusumik atugassaqartitsinertut taasariaqarparput, Sverigemiu socialdemokraati rigsdagimullu ilaasortaq Anders Karlsson Politikenimut oqarpoq.
- Socialdemokraatitut isumaqarpunga, danskit tungaannit immikkut inatsisiliortoqassanngitsoq. Taamaliortoqassappami navianartumut pulasoqassaaq qanorlu inerneqarnissaa nalunartuussalluni.
Siunnersuisoqatigiinni ilaasortat Norgemeersut ilaat, socialdemokraati Torfinn Opheim, Politikenimut oqarpoq "kinalluunniit socialdemokraatiusup ajornerusumik atugaqartitsinissaq akerlerisussaagaa, tamannalu sutigut tamatigut ilungersortumillu akiorniarneqartariaqartoq. Inatsit nunat tamalaat isumaqatigiissutaannik unioqqutitsissappat, tamanna ajuusaarnartupilussuussaaq".
Suliniutit angisuut pillugit inatsisip Kalaallit Nunaanni sapaatit akunneri marluk matuma siorna akuersissutigineqartup, nunap pisussuutaanut aningaasaliisoqarnissaanik qulakkeerisussaavoq, sulisartulli allamiut - aallaqqaammut kinamiut - tuusintilikkuutaat qaangiuttoornermusiaqartinneqaratik, feeriarnersiuteqartinneqaratik allanillu nalinginnaasunik aaqqiissuussiffigineqaratik immikkut akissaatitigut isumaqatigiiffigineqartussaassammata, tamanna nunani tamalaani isumaqatigiissutinik unioqqutitsisussatut immikkut ilisimasalinnit arlalinnit oqaatigineqarpoq.
Immikkut ilisimasallit arlallit naapertorlugit suliffeqarnermi killilersugaanani isumaqatigiinniarsinnaatitaanerit peqatigisaanik atorunnaarsinneqassapput.
