Suliniutit angisuut pillugit oqallinneq Folketingimi avissaartuussutaavoq
Partiit talerperliusut suliami matumani danskit naalakkersuisuinik tapersiissanersut nalunarpoq. Aalajangiisooratarsinnaapput, Dansk Folkepartimi Enhedslistenilu itigartitsiniarlutik nalunaaruteqareerput.
Konservativet siulittaasuat Lars Barfoed Politikenimut oqarpoq Naalagaaffeqatigisat inatsisiliornerat Konservativet aallaavittut tamatigut akuerisaraat.
- Matumani suliaq immikkuullarissuuvoq. Kinamiut tuusintilikkuutaat Naalagaaffeqatigiit iluanni sungiusimasatsinnit ajornerusumik atugassaqartillugit sulisinneqarnissaannut periarfissiinissaq soorunami eqqarsarnartupilussuusoq oqaatigaa.
Inatsisissatut siunnersuut naammassineqartinnagu Venstrep tungaanit ersarissumik oqaaseqarfigineqarumanngilaq. Politikenili naapertorlugu, politikkikkut oqaaseqartartup Ellen Trane Nørbyp immikkut inatsisissami ajornartorsiuterpassuaqarnerarpaa, pingaartumillu Kinap Issittumut sunniuteqarsinnaanerata annertuallaalernissaa eqqaallugu.
Kalaallit Nunaat pillugu oqaaseqartartulli Gitte Lillelund Bechip KNR-imut ullumikkut oqaatigaa, Venstrep Naalagaaffeqatigiinneq pimoorukkaa Inatsisartullu suliniutit angisuut pillugit inatsimmik akuersinerat ataqqillugu.
Liberal Alliance, qulingiluanik taasissuteqarluni aalajangiisuusinnaasoq, aamma suli nalorninarpoq.
- Inatsit Danmarkimut naleqqutinngitsunik kinguneqartitsissappat itigartitsinissamut piareeqqaavugut, Simon Emil Ammitzbøl Politikenimut oqarpoq. Kinamiut pinerluttut danskit parnaarussiviini inissanik tigooraasinnaassanersut ilaatigut ernumassutigaa.
Helle Thorning ilaalu, kalaallit folketingimut ilaasortaatitai ilanngullugit, maannamut 79-inik taasissutissaqarput. Naalakkersuisullu taamaasillutik taasinerit aqqanillit amigaatigaat, taakkulu Venstremi, Konservativeni, Liberal Alliancemi savalimmiormiullu ilaasortaatitaasa marluk akornanni pissarisiariniartussaassavaat.
