Suliniutit angisuut pillugit inatsisip allanngortitsiniassamut tunngavilersuutit Demokraatit tusarusuppaat
Sermersuup Kitaani Demokraatit siulittaasuata Aviaaja Karlshøj Poulsenip Siumup suut tunngavilersuutigalugit suliniutit angisuut pillugit inatsimmik akuerineqaqqammersumik allanngortitsiniarnerat ujartuiffigaa.
- Inatsip akuersissutigineqartussanngornerani qineqqusaarnerullu nalaani Siumut isornartorsiuisupilussuuvoq, naak inatsisip suliarineqarnera sukumiilluinnartuullunilu unnuup ataatsip ingerlanerani suliaanngikkaluartoq. Namminersorlutik Oqartussat inatsisiliornermi immikkut ilisimasalinnik ikiorteqarpoq ilitsersorneqarlunilu, tamannalu aamma inernerata takutippaa, ilaatigullu SIK-p, GA-p Transparency Greenlandillu akueralugu. Siumup qineqqusaarnermi sooq inatsit allanngortinneqassanersoq erseqqissumik tunngavilersorunanngilaa (tunngavilersorsinnaanngilaa) - allaanngilaq akerliussutsimik takutitsiniaannarluni iliuuseqartoqartopq, Aviaaja Karlshøj Poulsen isumaqarpoq.
Demokraatit aningaasaqarnermik immikkut ilisimasallit assingalugit suliniutit angisuut pillugit inatsisip allanngortinneratigut aningaasaleerusuttut qimarngutsinneqarnissaat ernumassutigaat. Aningaasaleerusuttut eqqarsaqqilaarnissaminnik oqariartuuteqarnerinik allaaserisat siulliit atuarneqarsinnaalereerput, Siumullu isummiussani aalajangiusimalluinnaarpaa, Demokraatillu isumaqatiginngilluinnarlugu. Siumup taama ersaritsigisumik nalunaaruteqarnerata kingorna siunissaq ernumanartoqartinneqalerpoq.
-Suliffissaalineq annertusiartuinnartoq pisortallu sipaarniartariaqalernerat. Inuussutissarsiutit nutaat, suliffiit nutaat nunattalu karsianut isertitassat allat pisariaqartippagut - kingunerisassai nunatsinni angerlarsimaffinni tamani qanittukkut sunniuteqalissanngippat. Aatsitassanik piiaanerup Nunatsinni piviusunngortinneqarnissaa ilungersorluta sulissutigaarput, taava sooq maanna unitsinneqassava?, Aviaaja Karlshøj Poulsen aperivoq.
