Suliniutit angisuut pillugit allannguutit SIK-p ernumanartoqartippai

Inatsit allanngortinneqassappat, sulisartut nunanit allaneersut akissaatitigut isumaqatigiinniuttarnissaannik SIK-ip isumaginnittuunissaanik piumasaqaasiortoqarnissaa Jess G. Berthelsenip neriuutigaa.

Sulisartunulli nunanit allaneersunut sulinermi atugassarititaasut pillugit Siumumit oqaatigineqarsimasut ataqatigiinnginneri ernumanartoqartinnerpaavaa.

- Nalunaarutissap nutaap qanoq ikkumaarnissaa suliniutillu angisuut pillugit inatsisiliornermik qanoq allanngortitsigissanersoq takussallugu pissanganassaaq. Siumumit allaanerusunik oqaaseqartoqartarpoq, politikerit qullersaasut ilaat, ilaatigut siulittaap tullia Karl Lyberth, sulisut ajornerusumik atugassaqartinneqarnissaat akerleralugu oqaaseqarsimalluni, Jess G. Berthelsen oqarpoq.

- Siumup Suliniutit angisuut pillugit inatsimmik maanna atuuttumik nutarterisoqarnissaanik kissaateqarnera ernumanartoqartippiuk?

- Aap, naalakkersuisunngortummi Suliniutit angisuut pillugit inatsimmi paragraf 10-mik allanngortitsissanersut ilisimaqqissaanngilarput, SIK-p siulittaasua oqarpoq.

Inatsisartunut qinersinissaq sioqqullugu Siumumit nalunaarutigineqarpoq pissaaneq tigoqqissaguniuk, Suliniutit angisuut pillugit inatsit nutarterniarlugu.

Suliniutit angisuut pillugit inatsimmi paragraf 10, Siumup allanngortikkumasaa, suliniutini angisuuni ingerlanneqalerumaartussanut atatillugu nunanit allaneersunik sulisorineqarumaartussat pineqarput.

Paragrafip immikkoortuata aappaani ilaatigut allassimavoq "Sulisut allamiut ... akissaatitigut ataatsimoortumik isumaqatigiissusiorfigineqarsinnaasut ... nunani allani suliatigut kattuffinnut isumaqatigiissutaasuni."

Paragrafilu taannarpiaq SIK-p siulittaasuata Jess G. Berthelsenip pitsaanerusunngorlugu allanngortinneqarnissaa neriuutigaa.

- Allanngortinneqassappat, pingaaruteqarpoq kattuffiit maani nunaqavissut, soorlu SIK, isumaqatigiinniarsinnaatitaatinneqarnissaat, Jess G. Berthelsen oqarpoq.

KNR-ip Aatsitassanut naalakkersuisoq Jens Erik Kirkegaard oqaaseqartinniaraluaramik iluatsinngilaa.

Suliniutit angisuut pillugit inatsimmi paragraf 10-mi allannguutaasinnaasunik SIK-p ernumassuteqarnera pissutissaqarnersoq apererusukkaluaratsigu.

Oqaaseqartissinnaasimanngilarpulli.