Suliniutit angisuut akuerivagut

Kalaallit nalinginnaasut suliniutit angisuut pillugit inatsit assortuussutaaqisoq akuersaarpaat, aatsitassanik piiaaneq nunanillu allanik aningaasaliissutit aningaasarsiornikkut imminut napatinnissamut aqqutissiuussisinnaammata.
apriilip 09-at 2013 06:46

Inuit isumaannik misissuinerup nutaap HS-analysep Ugebrevet A4-mut suliarisimasaani tamanna takuneqarsinnaavoq.

Sulisartulli allamiut Kalaallit Nunaannukarnerisigut akissaatitigut sulinermilu atukkat ajorseriarsinnaanissaat kalaallit quliugaangata sisamat ernumassutigaat.

Misissuinermi inuit 712-it ukiormanna februaarip marsillu qaammataani oqarasuaatikkut apersorneqarsimapput.

Misissuineq malillugu affaat sinnerlugit, tassalu 54 procentii, isumaqarput suliniutit angisuut pillugit inatsit Kalaallit Nunaata siunissaanut ajunngitsorujussuarmik imaluunniit ajunnginnerusumik sunniuteqassasoq.

Assinganillu affaasa missaat isumaqarput Kalaallit Nunaat aningaasarsiornikkut imminut napatinniassappat suliniutit angisuut pillugit inatsit aningaasaliisartullu nunanit allaneersut pisariaqartinneqartut.

Kalaallit Nunaata aningaasaqarnera pillugu siunnersuisooqatigiinni siulittaasoq aningaasaqarnermut professori siunnersuisuunerusimasorlu Torben M. Andersen naapertorlugu, kalaallit suliniutit angisuut pillugit inatsit soqutigisupilussuuaat.

- Misissuinerup takutippaa kalaallit namminiilernissartik kissaatigisupilussuugaat. Aammattaaq aatsitassat aatsitassanillu piiaaneq aningaasaqarnikkut imminnut napatinnissaminnut toqqammavigisariaqarnissaat ilisimaarivaat.

- Suliniutit angisuut pillugit inatsit akuersaarneqaraluartoq amerlasuut aamma suliasartut nunanit allaneersuut qanoq kinguneqartitsisinnaaneri ernumassutigaat.

Taamatullu ernumasoqarnerani tunngavigerpiarlugu Naalakkersuisunngortut suliniutit angisuut pillugit inatsit nutarterlugu aallartippaat, Kalaallit Nunaanni aatsitassanut naalakkersuisutut toqqarneqaqqammersoq Jens-Erik Kirkegaard erseqqissaavoq.

Suliniutit angisuut pillugit inatsimmut missingiut qaqugu piariissanersoq, aatsitassanut naalakkersuisunngortup neriorsuutigisinnaannginnerarpaa.

- Uannut pingaaruteqarpoq erseqqissassallugu tuaviuunneqassanngimmat innuttaasullu suliami tusaaniarneqartut misigisimassammata.