Suliniutinut inatsimmut allannguutissatut siunnersuut SIK-p apeqquserpaa

Sulisorineqartussat assigiinngitsunik isumaqatigiissusiorfigineqarsinnaanissaat, Suliniutinut angisuunut inatsimmut allannguutissatut siunnersuummi ilaatigut ammaassiffigineqarpoq. Tassa isumaqatigiissutinik Nunatta avataaninngaanneersunik nassareerluni assersuutigalugu Isukasianut tikissinnaanissaq ammaassiffigineqarluni. Taamatulli periarfissiisoqarnera ajornartorsiutinik nassataqassasoq, Sulinermik Inuussutissarsiuteqartut Kattuffiata oqaatigaa, Maarmorilimmilu pissutsit siornatigut atuussimasut ilaatigut assersuutigineqarlutik:

- Assigiinngitsunik isumaqatigiissusiortoqarsinnaanera Maarmorilimmi ajornartorsiutaanikuuvoq, tamatumalu kingunerisarpaa sulisut ulluinnarni iluamik suleqatigiissinnaannginnerat, pissutigalugu suliat assigiit assigiinngitsunik aningaasarsiaqartinneqartinneqartarmata. Taamaalillunilu inuiaat assigiinngitsut sulisartut suleqatigiissinnaanerigaluat ulluinnarni pinngitsoortittarlugu. Tamanna kingusinnerusukkut qujanartumik aaqqiivigineqarpoq, assigiimmik aningaasarsiaqalerlutik, SIK-p siulittaasua Jess G. Berthelsen oqarpoq.

Sulisartut avataaneersut akissarsiaat atugarisaallu pillugit isumaqatigiissutit Nunatsinni isumaqatigiissutigineqarsinnaanissaat, SIK-p ujartorpaa:

- Sulisartut ulluinnarni suleqatigiissappata, suminngaanniilluunnit aggeraluarpata pingaaruteqartorujussuuvoq assigiimmik aningaasarsiaqartitsisoqarnissaa, assigiimmillu isumaqatigiissusiortoqarnissaa. Taamaattormiuna pingaaruteqaraluartoq isumaqatigiinniarsinnaanerup maani Nunatsinni inissinneqarnissaa, taamaalilluni ulluinnarni atugassarititaasut assigiinniassammata, apeqqutaatinnagu sumi nunaminngaanniit aggeraluaraanni, Jess G. Berthelsen oqarpoq.

Suliniutini angisuuni illuliortiternernik sanaartornernillu suliassat pillugit inatsisip allanngortinneqarnissaa pillugu Naalakkersuisut siunnersuutaat, Aatsitassaqarnermut Naalakkersuisup Jens Erik Kirkegaardip saqqummiuttussaavaa, Inatsisartunilu ullumi oqaluuserineqartussatut pilersaarutigineqarluni.

Sulisut Nunatta avataaneersut immikkut isumaqatigiissusioreerlutik Nunatsinnut tikissinnaanissaat allannguutissatut siunnersuummi tassa siunniunneqarpoq, Jess G. Berthelsenillu tassa tamanna apeqquserpaa:

- Massakkut inatsimmi periarfissiivoq isumaqatigiissutinik assigiinngitsorpassuarnik atuisinnaaneq, taannalu ernummatigaara ulluinnarni suleqatigiissinnaanermut sequtserisinnaanera suliffeqarfimmik taama ittumik soorlu assersuutigalugu Isukasiani, SIK-p siulittaasua Jess G. Berthelsen oqarpoq.

Danmarkimi sulisartut kattuffissuata LO-p inatsit pioreersoq, allannguutissatullu siunnersuut, siusinnerusukkut isornartorsioreerpaa.

Sulisut immikkut isumaqatigiissusioreerlutik Nunatsinnut tikissinnaanissaat matumani aamma isornartorsiorneqarpoq. Sulisut angalanerannut atatillugu sulisitsisut aningaasartuutinik matussusiisinnaanissaat pillugu, matumanilu aamma pisussaaffilerneqanngitsoorsinnaanissaat, LO-p ilaatigut isornartorsiorpaa.