Suliniutinut angisuunut inatsit qallunaat aviisiisa taperserpaat
Aviisimi Ekstrabladet-imi aaqqissuisoq, Poul Madsen, sakkortunerpaamik oqaaseqarpoq. Qallunaat pisuutippai Kalaallit Nunaat nunasiaatitut isigigaat, piniartunit poqiitsunit aqunneqartoq, piniartullu taakku qanoq ingerlassanerlutik suli ilitsersuunneqartariaqartuusut.
- Kalaallit namminneq taama annertutigisumik suliffeqarfissualiornissaanut ikippallaarneri ajornartorsiutaavoq, ilami 56.000-iinnaammata, Poul Madsen Ekstra Blademi taama allappoq.
- Tassa Horsens-ip innuttaasa amerlaqataat aatsitassarsiornissaanut piumaffigineqarput. Tamannalu piviusorsiortuunngimmat avataaniit sulisunik ikiortissanik tikisitsiortornissaat avaqqunneqarsinnaanngilaq, taamaammallu inuppassuarnik isaavigineqartinnatik inatsisinik tulluartunik innuttaasut qulakkeerneqartariaqarput, tamannalu Naalagaaffeqatigiinnerup aqqani Danmarkip Kalaallit Nunaatalu suleqatigiissutigilluarsinnaavaat, Poul Madsen allappoq, Danmarkimilu sulinermik inuussutissarsiuteqartut kattuffianit LO-meersut nunasiaateqarpalaarlutik oqarluartaarneri ima assuaralugit:
- LO Kalaallit Nunaanni susassaqanngilluinnaraluarpoq. Taamaattorliaasiit Kalaallit Nunaanni ineriartornermut akimmisaartitsiniarsarinialerput, ilaatigut nunat tamalaat eqqartuussiviat aqqutigalugu. Taamaaliorniarnerallu qujageqqusaarnertut taasariaqarpoq, ilami qallunaat suliffeqanngitsut tuusintilikkaat sermersuarmut suliartortinneqassagamik? Kinamiummi nunat allamiulluunniit sanaartortinneqarsinnaanngippata Kalaallit Nunaanni aatsitassarsiorneq ingerlanneqalersinnaassanngilaq, Danmarkimiillu tapiissutinik isumalluutaasutuaalissalluni, Poul Madsen Ekstra Blade-mi taama ilaatigut allappoq