Suliniutinut angisuunut inatsisissaq paasiuminaappallaarnerarneqarpoq
Tamanut ammasumik inuiaqatigiinnut paasissutissiisarnissaq pingaarnerpaat ilagaat, soorlu piiaaffissat pilersaarusiorneqarnerini nunap ataqatigiinnermut attaveqarfiisa suliarineqarnissaanut pilersaarusiorneri qanoq ingerlanersut. Naak naalagaaffiup aningaasaatai atorlugit sanaartornerit ingerlanneqanngikkaluartut inuttaasut malinnaatinneqarnissamik pisinnaatitaaffeqarput.
-Kalaallit Nunaanni innutaasut sanaartugassanut iluarsartuullugit pilersaarusiorneqartunut taakkununnga malinnaatinneqarnissaminnut tunngaviusumik pisinnaatitaaffeqarput. Tunngaviusumik tamanut ammanerusumik periuseqarnissaq atorneqalertuuppat tamanna periarfissanngussagaluarpoq. Inatsisiliortut taamaalillutik innuttaasut pisariaqavissunik ilisimatinneqartarlernissaat angussagaluarpaat, suliassallu pilersaarusiorneqartut innuttaasuniit tapersersorneqarnissaat aamma qularnaarneqassagaluarpoq, Anders Meilvang knr.gl-imut oqarpoq.
Inatsisissatut siunnersuummi sanaartorfiutillit ‘Impact Benefit Agreements’-inik taaguutilinnik arlalinnik piumaffigineqartalissasut allaqqavoq. Soorlu peqqussutit ilagaat tamaanimiunik ilinniartuuteqartarnissaat. Aaqqissuussineq Kalaallit Nunaannut innutaasunullu ajunngilluinnartoq, piumasaqaatilli malinneqanngippata unioqqutitsisunut qanoq kinguneqartassanersoq inatsisissatut siunnersuummi allaqqanngilaq.
-Inatsisissami peqqussutit malinneqanngippata Naalakkersuisuniit qanoq kinguneqartinneqarsinnaanissaata inatsisissami ilanngunneqarsimannginnera ajorpoq. Sanatitsisut inatsisit malillugit pisussaaffittik puigorluinnarunikkit taava qanoq iliortoqassavami. Akiliuteqartitsinissamut imaluunniit ajornerusumik kinguneqartitsinissamut periarfissaqartitsisoqanngilaq, tamannalu sukkarnerpaamik allanngortinneqartariaqarpoq, taama Anders Meilvang Transparency Greenland-imeersoq oqarpoq.
Peqatigiiffik Transparency Greenland nammineq kajumissutsiminnik suliaqartunit ingerlanneqarpoq, taamaattumik inatsisitigut suliap annertuup tamakkiisumik paasiniarnissaanut periarfissaat killeqarput. Canadami pissutsinut assersuukkaanni naalagaaffiup peqatigiiffiit Transparency Greenland-itut ittut aningaasalersortarpaat, inatsisissanik suliaqarnermi isummat assigiinngitsut tusarneqarniassammata. Nunamili maani peqatigiiffiit taama ittut Inatsisiliortunit nikassarneqartarput.
-Ove Karl Berthelsenip ICC-mut assuarlernera naapertuutinngilluinnarpoq. Inatsisiliortut nuannaarutigisariaqaraluarpaat inatsisiliornerminni assigiinngitsunit immersorneqarularnissartik, paasissutissat pisariaqartinneqartut najoqqutaralugit inatsisiliortoqarniassammat. Amerlanerusut isummersuinerisigut ajunnginerusoq anguneqassammat. Soorluluunniit nunami maani neriuutigigaat tusarniaasoqarnerani nutaanik siunnersuuteqartoqannginnissaa, politikerit nammineerlutik sutigut tamatigut susoqassanersoq aaliangersinnaaniassagamikkit. Peqatigiiffimmi NGO-mi siulittaasutut isumaqarpunga pisussaasugut alaatsinaannissatsinnik, suliniutini angisuuni pingaaruteqartunilu akimut erseqqarissumik ammasumillu periuseqartoqarnissaa anguneqarniassammat, taama Anders Meilvang nassuiaavoq.
