Suliniut Sapiik Kunngikkormiunit aningaasaliiffigineqarpoq
Aningaasat tapiissutigineqartut inuusuttut ilinniagaqalernissamik kajuminnerulernissaat siuertaralugu suliniummut, Sapiimmut, atorneqassapput.
Peqatigiiffimmi Kalaallit Meerartaanni qullersap, Tina Frausingip, aningaasat qujaruteqai:
- Tunissutit qujanaqaat, aammali meeqqanut inuusuttunullu sullissinitta soqutigineqarnera nuannaarutigeqaarput. 100.000 koruunit aningaasarpassuupput. Taama amerlatigisunik tunisinneq imaannaanngilaq, taamaammat aningaasanik taama amerlatigisunik tunisikkaangatta suliniuteqarniarnerput sukkanerusumik ingerlasarpoq, Tina Frausing oqarpoq.
Meeqqat atuarfianniit atuarunnaarsimasut amerlanersaasa ilinniagaqaqqinnissaat anguniarlugu Sapiik Peqatigiiffik Kalaallit Meerartaannit 2009-mi pilersinneqarpoq. Meeqqat ukiuni kingullerni marlunni atuarneranni inuusuttunit piumassutsiminnik sulisunit malinnaavigineqartarput. Taakku namminneq ilinniagaqartuusimapput, taamaammat ikiuukkusuttarlutik.
- Atuarfimmut tunngassuteqanngitsunik sammisassaqartitsisarpugut. Atuartut 9.klassimiittut sapaatip-akunneranut unnuk ullorluunniit ataaseq assigiinngitsunik sammisaqartittarpavut, taamalillutik kajumissuseqalersarput annertoqquteqalerlutillu. Siunissami sunngorusunnersut oqaloqatigiissutigisarpaat, Tina Frausing nassuiaavoq.
