Suliniut partiit arlallit taperserpaat

Meeqqat 120-t suliniummut taassumunnga ilaapput, pingasuugaangatalu marluk kommunip ilisimanngisaanik ajornartorsiuteqartuusimapput.

Suliniummi inernerit Peqatigiiffik Kalaallit Meerartaannit Christiansborgimi ullumi saqqummiunneqarput, meeqqallu atukkamikkut Danmarkimi ilungersunartorsiortut 1000-it missaat qanoq iliuuseqarfigineqarsinnaanerat qinikkat eqqartorpaat.

- Atuarfimmi suliaqarneq ajoraluarpunga, issiarusaaginnartaraluarlunga. Malinnaananga utaqqiinnartarlunga, 17-inik ukiullip Karina Nielsenip Esbjergimi maanna najugalllip "Danmarkimi Inuuneq Pitsaanerusoq"-mut suli peqataalinnginnermini inuunini taama oqaluttuaraa.

Suliniummut peqataanini, taassuma iluaqutigisimaqaa:

- Maannakkut malinnaalluaqaanga, arlaannillu paasisaqarsimanngikkaangama aperisalernikuullunga, Karina Nielse oqarpoq.

Taanna ammanerulersimavoq, ikinngutitaartorsimalluni timersortalersimallunilu. Kickboksningertalerpoq, angutaatitaarlunilu.

Kalaallit meerartaat amerlasuut suliniummut "Danmarkimi inuuneq Pitsaanersusoq"-mut peqataapput, iluaqutigeqisaminnik. Suliniulli iluaqutaagaluartoq kalaallit meerartaat 1000-it missaat atukkamikkut ilungersunartorsiortut, Peqatigiiffiup Kalaallit Meerartaasa nalilerpaat.

Meeqqat taakku iliuuseqarfigineqartariaqartut, Christiansborgimi tusarniaanermi isumaqatigiissutigineqarpoq. Suliassamut pilersaarusiortoqartariaqartoq, Folketingip Inunnik Isumaginninnermut Ataatsimiititaliaata siulittaasuata Sara Özlem Cekicip siunnersuutigaa:

- Ukiut sisamaannaat eqqarsaatiginagit siunissaq ungasinnerusoq eqqarsaatigalugu iliuuseqarutta angusaqarluarsinnaavugut, taamaammat immikkut ilisimasallit matumani peqataatittaqarpavut, Sara Özlem Cekic oqarpoq.

Maanna naalakkersuisuusut suliniuteqarnissamut neriorsuutigisimasamik alannginnissaat, Venstrep Inunnik isumaginnermut tunngassuteqartunut oqaaseqartartuata Eyvind Vesselbop qulakkeersimaniarpaa:

- Suliassanut pilersaarutit ilaatigut paamaarunneqartartut nalunngilara. Taamaammat naalakkersuisut maanna iliuuseqartariaqarut isumaqarpunga, Eyvind Vesselbo oqarpoq.

Pilersaarutit aningaasanut inatsisissatut siunnersuummut ilanngunneqarnissaat taassuma innersuussutigaa, immikkut ittunut aningaasaliissutinut ilanngunneqaratik.

- Pimoorullugu suliniuteqartoqarniartoq taamaaliornikkut ersersinniarneqassaaq, tusarparalu aningaasat 10 millionit koruunit naammassasut, amerlanerussagaluarpatalu immikkut ittumik aningaasaliisoqarnissaa ajornartorsiutaasariaqanngilaq, Eyvind Vesselbo oqarpoq.

Sara Olvigillu Eyvind Vesselbo isumaqatigaa:

- Suliniutit assigiinngitsut ukiumiit ukiumut aningaasalersorneqartarsimanerat atorunnaarlugu, aalaakkaasumik aningaasalersorneqartalernissaat anguniarlugu taamatut apeqquteqarpunga. Suliniut una ukiuni sisamanut atuuttussatut aningaasalersorneqarsimavoq, aappaagulu 2012-imi unitsinneqartussaalluni. Taamaammat aalaakkaasumik aningaasanut inatsimmut ikkunneqarsinnaanersoq apeqqutigaara, meeqqanut suliniut uninnginniassammat, Folketingimut ilaasortaq Sara Olsvig oqarpoq.

Peqatigiiffiup Kalaallit Meerartaasa suliniutaata aningaasanut inatsimmut ilanngunneqarnissaa partiinit tamanit taperserneqartoq, oqallinnermi ullumikkut erserpoq.

Suliuniut "Danmarkimi Inuuneq Pitsaanerusoq" maanna malitseqalissaaq, sulili aningaasaliiffigineqarani.