Suliniut isumalluarfigaat

Allattoq Mads Lynge
juulip 04-at 2007 11:04

Naartut kissaatigisaallutik meerartaarineqarnissaanik peqqissumillu alliartorsinnaanerannik suliniut Tasiilami, Illoqqortoormiuni, Nuummi Aasiannilu qaammat ataaseq ingerlareersoq isumalluarnarpoq. Taama oqarpoq Tasiilami juumooq Susanne Houd.

Suliniut naartusut siusissukkut ikiorneqarnissaannik siunertaqarpoq.

-Maani Tasiilami suliniut qaammat ataaseq ingerlatereerparput, nuannaarutigeqaarpullu illoqarfinni siullersanut ilaanerput. Susanne Houd, Tasiilami juumooq oqarpoq.

Ilaqutariittut meerartalittut peqqissumik inuuneqarnissamik suliniut Peqqinnissaqarfiup Inunnillu Isumaginnittoqarfiup angajoqqaanngortussat suleqatigilluinnarlugit ingerlappaat.

Angajoqqaanngortussat ikiorserneqarnissamik pisariaqartitaat assigiinngitsorujussuusarput, ilaqutariimmi ilaat ikiorsertariaqanngitsut ilaat meeqqaminnik sumiginnaasunngussanngikkunik inuttut tapersersortariaqartarput siunnersorneqarlutillu.

Tasiilami suleqatigiissitaq ”Indsatsgruppe”-mik taasaq, juumuumik, meeraaqqerisumik, inunnik isumaginnittoqarfimmeersumik, tarnip pissusaanik ilisimasalimmik allanillu susassaqartunik inuttaqarpoq. Suliniaqatigiit ullut 14-ikkaarlugit ataatsimiittarput, ilaqutariillu ikiorsertariallit sumut killinnerat pillugu oqaloqatigiittarlutik. Ukiup affakkaarlugillu tamakkiisumik nalilersueqqittoqartassaaq.

- Pingaartorujussuuvoq angajoqqaanngortussat qanimut suleqataanissaat pisunullu aalajangeeqataasarnissaat, aatsaat taamaliornitsigut ilaqutariit peqqissut, meeqqaminnillu sumiginnaanngitsut pilersissinnaagatsigit, Susanne Houd erseqqissaavoq.

Asii Chemnitz Narup-ip Peqqissutsimut Naalakkersuisuunermini suliaq aallartitaa, tassalu nunatsinni peqqinnerulernissaq anguniarlugu ukioq 2012-ip tungaanut suliniut aallarteruttorpoq.

Immikkullu ilaqutariinnik siunnersuineq Tasiilami illoqarfinnilu allani pingasuni, Illoqqortoormiuni, Nuummi Aasiannilu aallarteqqammersoq, ukiuni tullerni illoqarfinni allani aamma ingerlanneqalissaaq.

Susanne Houd aamma ilisimatitsivoq, immikkut naartuersittarnerit pillugit Tasiilami suliniuteqarnertik, Maniitsumi misilittakkat tunngavigalugit ingerlatilersimasartik, naartuersinnerit ikiliartuutigilersimagaat, neriuutigaalu suli naartuersinnerit ikiliartuinnassasut.