Suliniut iluatsilluartoq aallarteqqilerpoq
Suliniummi nutaami Et bedre liv i Danmark-imik qulequtserneqarsimasumi Københavnimi, Aarhus-imi, Aalborg-imi kiisalu Esbjerg-imi ingerlanneqartussami kalaaliaqqat Danmarkimi atugarliortut inuunerinnerulernissaat anguniarneqarpoq, Puk Draiby, peqatigiiffik Grønlandske Børn-imeersoq taama oqarpoq.
- Kalaaliaqqat atuarfinni katataasarneri, sunngiffimmi neqeroorutaasartunut akuuallaanngitarneri, kiserliortarnerilu ilisimavagut. Taamaammat una suliniut aqqutigalugu kalaaliaqqat ilaqutaalu sammisassaqartinniarpavut, inuiaqatigiinnilu periarfissaasunut atuilluarsinnaanerulernissaat siunertaralugu pikkorissarniarlutigit. Taamaasiortoqarsinnaassappammi Kalaaliaqqat ilaqutaalu sumiiffigisaminni sunngiffinni neqeroorutinut akulerunnissaminnut kaammattussuavut, taamaasillunilu nuannernerusumik ilaqutariittut inuulernissaat anguneqarsinnaalissalluni, Puk Draiby oqarpoq.
Danmarkimi inuunerinnerulernissamut suliniut ingerlanneqarmat kalaaliaqqat atugarliortorpassuit qallunaat oqartussaasuinit sumiginnarneqartarsimasut paasineqarpoq. Tamannalumi tunuliaqutaralugu kalaaliaqqat 120-t pillugit assigiinngitsunik 100-nik peqatigiiffik nalunaarusiormat kommuninit ikiorsiissutit assigiinngitsut 77-nik pilersitsitsisoqarpoq, meerarpassuillu angerlarsimaffiisa avataanut inissitsiterneqarnerinik kinguneqarsimalluni. Puk Draiby-lli isumaa malillugu kalaaliaqqat ilaquttaminniit avissaartinneqarnissaat suliniummi anguniarneqanngilaq.
- Meeqqat pineqartut ilaqutaalu ataatsimoortillugit ikiorserneqartarnissaat siornatigornit siunniussimaneruarput. Aamma meeqqat immikkut sullinneqartariallit ilikkagaqarfigilluareerpavut, taakkumi uagut nukissaqartinngilavut, kommunillu immikkut neqeroorutaanut innersuullugit pitsaanerusoq paasisimallutigu, Puk Draiby oqarpoq.
Peqatigiiffiup Grønlandske Børn-ip naliliinera naapertorlugu kalaaliaqqat Danmarkimiittut 1.000-t missaaniittut atugarliortuupput, taakkulu tapersersorneqaannarnissaat suli pisariaqartoq Puk Draiby-p oqaatigaa.
- Danmarkimut Kalaallit Nunaannullu nussortoqartuaannartoq takusinnaalluarparput. Taamaammat ilaqutariit maannga nuuttut ilaasa kultooritsinnut oqaatsitsinnullu ilisimasaqarpiarneq ajormata qallunaat ulluinnarsiutigisartagaat ilisimaneq ajorpaat, tassa ilaqutariit taakkorpiaat eqqugaanerlunnerpaajusarput, Puk Draiby oqarpoq.
Suliniut Et Bedre Liv i Danmark-imut atatillugu Danmarkimi illoqarfinni ataasiakkaani meeqqanut 15-inut inissaqartitsisoqarpoq, Københavnimilu kisimi inissat amigarlutik. Suliuniut ukiuni tullinnguuttuni sisamani ukiumut 6 millionit koruuninik naalagaaffiup aningaasaliiffigisimavaa, ukiullu sisamat qaangiussimaleriarpata suliniut qanoq iluaqutaasimatiginersoq nalilersuiffigineqassalluni.
