Suliniummi suleqataasut piginnaasaqarnerulerput

Nuna tamakkerlugu suliniummi ’Ilaqutariinnut meerartaartussanut siusinaarluni iliuuseqarneq’-mi suleqataasut 23-t siunersioqatigiinnermi ilitsersuisutut ilinniarnerup tunngaviusumik ilinniarnertaa angusiffigeqqammerpaat. Namminersorlutik Oqartussat tusagassiorfinnut uullumi taamatut nalunaaruteqarput.
juunip 03-at 2011 12:28

Siunersioqatigiinneq oqaloqatigiinneruvoq aaqqissugaq. Siunersioqatigiinnermi ilitsersuisup inuk ataaseq imaluunniit amerlanerusut ajornartorsiutaasinnaasut misissornissaannik, erseqqissarnissaannik aammalu taakku isikkivinniit nutaanit isigineqalernissaannut ikiortarpai.

Suliniummi inunnik isumaginninnermi immikkoortoqarfiit peqqinnissaqarfimmilu immikkoortortat suleqatigiinnermigut sumiginnaasarnerup annikillisinniarnera siunertarineqarpoq.

Suliniummi suleqataasut suleqatigiillutik, ilaqutariit meerartaartussat, meeqqaminnik naammattumik tapersersuinissaminni meeqqallu alliartornerani naammattumik isumassornissaanut ajornakusoortitsilersinnaasut nassaariniartarpaat ikiortarlugillu.

Suliniummi ’Ilaqutariinnut meerartaartussanut siusinaarluni iliuuseqarneq’-mi suleqataasut inunnik isumaginnittoqarfinni peqqinnissaqarfimmilu atorfeqartuupput. Tassaappullu juumuut, peqqissaasut, inunnik isumaginninnermi peqqinnissamilu ikiortit, perorsaasut, inunnik isumaginninnermi siunnersortit pinaveersaartitsinermilu siunnersortit.