Sulinikkut akissarsianit akileraarutit aappaagu appassapput
Naalakkersuisut akileraarummik appartitsiniarnerminni pilersaarutaat, Inatsisartut Ukiamut ataatsimiinnissaanni saqqummiunneqassaaq.
Aningaasaqarnermut Naalakkersuisoq, Maliina Abelsen naapertorlugu, akileraarutip appartinneqarnerata kingunerissavaa, innuttaasut sulerusussuseqalernerat. Tassalu tamannarpiaavoq Naalakkersuisut akileraarut pillugu isumaliutersuutaasa ilaat.
Akileraarutip 37 procentimut appartinneqarnissaa, Akileraartarneq Atugarissaarnerlu pillugit Suleqatigiissitap siunnersuutigaa. Taama annertutigisumik appaaniarneq, siunissaq eqqarsaatigalugu imminut akilersinnaanngitsoq, Maliina Abelsenip ullumi oqaatigaa.
Akileraarutip 1 procentimik appartinneqarnerani, qanoq iliornikkut tamanna allatigut matussuserneqassanersoq, Maliina Abelsenip maanna oqatigerusunngikkallarpaa. Akileraarutip 1 procentimik appartinneqarnerani inuiaqatigiit ukiumut 70 million koruunit annaasassavaat.
Naatsorsuutigineqarporli ullumikkut akileraarusersugaanngitsutigut, soorlu obligationinit aningaasaatinillu iluanaarutinit akileraarutip appartinneqarnera aningaasalersorneqassasoq.
Apeqqutit tamakku pillugu, Pingasuulluni oqaloqatigiinnerit, tassa sulisitsisut sulisartullu akornanni oqaloqatigiinnerit maanna aallartereerput.
