Suliniaqatigiiffik: Persuttaasarneq unitsilli

Nuummi arnaq 54-inik ukiulik aapparminit persuttarneqarnermi kingorna sapaatip akunnerata naanerani toquvoq.

- Tusagassiuutitigut taamatut pisut tusarliunneqaraangata qanoq iliuuseqartoqarneq ajorpoq, Kistaraq Egede Jensen suliniaqatigiiffimmit 8. Marts gruppimeersoq oqarpoq.

Taanna isumaqarpoq persuttaasarnerit nakuusernerillu unitsinneqassappata inuit akornanni oqallinneq isummersoqatigiinnerlu aallartinneqartariaqartoq.

- Oqallinneq aallartinneqartariaqarpoq paquminartutut isigiunnaarlugu, oqarlutalu persuttaasarneq unitsinniarli!" Kistaraq Egede Jensen oqarpoq.

Sanilerisat persuttaanermik atuippata taakkua politiinut oqaatigineqartarnissaat aamma kaammattuutigaa.

- Meerartaqarpata kommuunimut nalunaarutigalugit, Kistaraq Egede Jensen oqarpoq.

Suliniaqatigiiffiup 8. marts gruppip aaqqissugaanik Nuummi kulturikkut illorsuup Katuap silataanit aqagu sisamanut ingerlaaqatigiittoqassaq.

Sinerissami ingerlaaqatigiittoqarnissaa suliniaqatigiiffimmit aamma kaammattuutigineqarpoq.