Suliniaqatigiiffik: Nunap inoqqaavi Danmarkip sumiginnarpai
- Aningaasat tapiissutaasartut unitsinneqarpata taavani inunnut sunniuteqarnerluttorujussuussaaq. Tapiissutaasaraluartut annikitsunnguit annertuumik sunniuteqaataasaraluarput. Ruslandip avannaata ilaani tikillugit takunikuusama inuit atugaat ajorluinnarput pitsanngornissaallu neriuutigineqaruminaallutik. Inuit apummi niffakuni toqungasut takunikuuakka. Nunap timaani saamit allallu itsarli nunap inugisaasa najugasqarfiini inuit atugaat ajorsiartuinnavipput, Infonorip siulittaasua Claus Oreskov taamatut oqarpoq.
Peqatigiiffik Ruslandip avannaani nunat sanilerisat ineriartornerannut tapiissutaasartut atorlugit arlalinnik, soorlu tuttuuteqarnerup tungaatigut suliniuteqaraluarpoq. Kalaallit Aallartitaqarfiat kattuffillu naalakkersuisunut attuumassuteqanngitsoq IWGIA, Ruslandimi nunap inoqqaavisa eqqumaffigineqarunnaarnerat isornartorsiorpaat.
Taamaammat ineriartornermut ministerip Christian Friis Bachip Folketingimut neriorsuutigereerpaa, nunanut sanilerisanut tapiissutaasartut pillugit iliuuseriniakkanut nunap inoqqaavi taputartuunneqarnissaat. Tamannali Infonorip naammaginngilaa. Claus Oreskov isumaqarpoq, nunap inoqqaavinut tapiissutaasartussanik immikkut ittumik pilersitsisoqartariaqartoq.
- 2000-imi Folketingimi annertuumik tusarniaasoqarnerani Danmarki itsarli nunap inugisaanut aningaasaliissutaasartut ataannarnissaannut pituttornikuuvoq. Taamanikkulli aningaasat tapiissutaasartut assigiinngitsunut inissinneqaqattaareerlutik maannakkut nunanut sanilerisanut tapiissutaasartunut akulerunneqarnikuupput. Maannakkulli Ruslandimut tapiissutaasartut unitsinneqarput, taamaalillutillu itsarli nunap inugisaasa taperneqartarnerat unitsinneqarluni. Tamanna uanga annertuumik napertuilluannginnertut isigaara.
Nunanut sanilerisanut tapiissutaasartut ataanni immikkut ittumik tapiissuteqartoqartalernissaa Ineriartornermut ministereqarfimmit itigartinneqarpoq, taamaattorli naqissuserneqarluni nunap inoqqaavisa pisinnaatitaaffii nunanut sanilerisanut tapiissutaasartut ataanni ‘Demokratii Pitsaasumillu nunamik naalakkersuinermut’ immikkoortitat aqqutigalugit taperneqartartussaasut.
Ruslandimi nunap inoqqaavisa kattuffiat Raipon Ruslandimi qullersanit matuneqarmat, nunap inoqqaavinut tapiissutaasartut ulluni makkunanerpiaq eqqumaffiginiarneqarput. Siornatigut Danmarki nunanut sanilerisanut tapiissutaasartut aqqutigalugit Raiponimut tapiisarnikuuvoq. Nunanut allanut ministerip Villy Søvndalip oqaatigaa, sapaatip akjunnerani tulliuttumi Ruslandimut tikeraaruni Raiponip matuneqarnera naalakkersuisut oqaloqatiginerini eqqartugassanut ilanngunniarlugu.
