Sulinerup nalaani timigissartarnissaq tapersersunngilaat
Siumut qineqqusaarnerup nalaani neriorsuutigisaa, tassalu sulinerup nalaani akunnermi ataatsimi timigissartarnissaq piviusunngortinniarneqarnersoq, qaqugulu tamanna aallartinneqassanersoq, Palle Christiansenip Naalakkersuisunut apeqquteqaatigaa.
Aningaasaqarnermut Nunamullu Namminermut Naalakkersuisoq Vittus Qujaukitsoq akissuteqarluni oqarpoq, Siumup partiiata tamarmiulluni saqqummissimanngikkaa isumassarsiarli qinigassanngortittup ataatsip nammineerluni saqqummiussarimmagu.
Vittus Qujaukitsorlu ilumoorpoq, Siumut sinnerlugu qinigassanngortittup tamanna siunnersuutigaa. Doris Jakobsen taamani siunnersuuteqarpoq sulinerup nalaani akunnermi ataatsimi timigissartartoqassasoq - pujortarternermut inatsit Juliane Henningsenip IA-meersup siunnersuutaa sukaternagu.
Sulisut pujortartarunnaarnissaannut suliffeqarfiit annertunerusumik sungiusartitsisalernissaat, sulisullu timigissartarfiliartarnissaannut suliffeqarfiit akileeqataasalersinnaasariaqartut, Doris Jakobsenip Inatsisartuni ukioq manna marsip aallaqqaataani oqallinnermi oqarpoq.
Vittus Qujaukitsoq Palle Christiansenimut akissuteqarluni allappoq Naalakkersuisut pilersaaruteqanngitsut suliffiup nalaani timigissarnissamut sulisut tamaasa akunnermik ataatsimik sulinngiffeqarnissannik. Taamaattumillu aamma timigissartarnissamut atasumik aningaasartuutit naatsorsorneqarsimanatik.
Qitiusumik allaffeqarfiup pingaarnerusumik suleqatigiinnisamik ataatsimiititaliaa Naalakkersuisut nutaat atuutilinnginneranni aalajangiuppaat suliffiup nalaani timigissartoqartassanngitsoq, Vittus Qujaukitsoq, Palle Christiansenip paragraf 37 najoqqutaralugu apeqquteqaataanut akissuteqarluni taama allappoq.
