Inatsisartut Sulinermut ilanngaat oqallitsitsisoq
Inatsisartut pisarneq malillugu ilaatigut inummut ilanngaat akuersissutiginiarlugu oqallinneranni sulinermi akileraarutinut ilanngaatip eqqunneqarnissaa sisamanngornermi inatsisartuni annertuumik oqallisigilerpaat.
Akileraarnermut Inatsimmi allaqqavoq Inatsisartut akileraarnermut ilanngaatit 2019-imut atuuttussaq, 2018-imi ukiup affaani siullermi Inatsisartut katersuunneranni aaliangerneqassasut.
AAMMA ATUARUK Suliffeqarnermi ilanngaat, mittarfiit soraarnerusutisialinnullu aningaasat amerlanerit
Partiillu naalakkersuisoqatigiittut naalakkersuisooqatigiinnissamik isumaqatigiissummi allapput sulinermi akileraarutinut ilanngaat 2019-mut atuuttussaq eqqunneqassasoq.
- Qineqqusaarnermi taaneqarsimasut kingusinnerusukkut saqqummiunneqarumaarput. Piffissaaleqivugut, Hermann Berthelsen, oqaluttarfimmiit ilaatigut oqarpoq.
Taamaasisoqarmat illuatungiliuttut IA aamma Demokratit sulinermi akileraarutinut ilanngaat, ilanngaatit Inatsisartut maanna akuersissutigisassaannut sunniuteqassanersut qarajalerpaat.
- Paasivarput Naalakkersuisut sulinermi akileraarutinut ilanngaat naalakkersuisoqatigiinnissamik isumaqatigiissummi allaqqasoq. Takorloorneqarpa sulinermi akileraarutinut ilanngaat pilersinneqarniartoq, akileraarutinut ullumikkut sammisassatsinnut sunniuteqassanersoq? Tamanna Demokratit siulittaasuata Randi Vestergaard Evaldsenip ilaatigut paaserusuppaa.
AAMMA ATUARUK Siumut IA-lu sulinermut ilanngaammik eqqusserusuttut
Aningaasaqarnermut Naalakkersuisoq Pele Broberg Parti Naleqqameersup nalunaarutigaa Naalakkersuisut sulinermi akileraarutinut ilanngaat aningaasaqarnermut inatsimmut tunngatillugu suliarineqassasoq, maannakkullu ilaanngaat eqqunneqarpat qanoq aningaasatigut sunniuteqassanersoq oqaatigisinnaanagu.
Oqallinnerup inerneraa naalakkersuisooqataasup Parti Naleqqap, ilanngaatissatut siunnersuut aningaasaqarnermut akileraartarnermullu ataatsimiisitaliamut ingerlateqqinnissaanut ilaliineranik.
Aningaasaqarnermut akileraartarnermullu ataatsimiisitaliaq siunnersuummik suliaqarnissaminnut sivisuumik piffissalerneqanngillat. Ukiumut tullermut ilanngaatissat ataasinngorpat aappassaanerlugit suliarineqartussaammata, piffissarlu taanna tassaalluni immikkut ittumik katersuutitsinermi ataatsimiiffissaq kingulleq.
AAMMA ATUARUK Suliffeqarnermut ilanngaat tamanut iluaqutaassanngilaq
AAMMA ATUARUK Sulinermut ilanngaammik eqqussiniarneq SIK-p GE-llu qularnartoqartikkaat