Sulinermut ilanngaat akileraarutitigut oqilisaassinermut taarsiullugu

Tusarniaanermut akissuteqaammi juulip qaammataaneersumi GA-p siunnersuut isornartorsiorsimavaa arlalitsigullu pitsanngorsaateqartoqartariaqarneranik erseqqissaateqarsimalluni. Siunnersuutip anguniakkanik pingaarnernik pingasuusunik GA-p naammassisaqarsorinngilaa. Akileraartarnikkut tunngavissap annertusaaffigineqarnissaa, isumaginninnikkut oqimaaqatigiissitsinerunissaq inuiaqatigiinnilu ineriartortitsinissamut pitsaanerusunik killiliussaqartitsinissaq.

-Naalakkersuisut taamatut siunnersuuteqarnerisigut akileraartarnikkut tunngavissaq annertusissangatinngilarput, paarlattuanilli pisoqarnissaa naatsorsuutigalutigu. Akileraarusersiuffiit maanna pioreersut akileraarusersuiffigineqarnerisigut aningaasatigut annikinnerusumik pisoqarfiullutillu suliffissanik ikinnerusunik pilersitsisarput. Suliffissat amerlanerusut pisariaqartippagut, aallartiinnartariaqarlutalu. Maannakkorpiaq suliniutissat pitsaasut arlallit piareersimapput akuerineqarnissaallu utaqqisaaginnarluni, soorlu ilaatigut rubininik piiaaffissaq, taannaannarlu ikinnerpaamik suliffinnik 50-inik pilersitsisinnaavoq,  GA-mi pisortap Brian Buus Pedersenip knr.-gl-imut oqaatigaa.

Akileraarutit procentimik ataatsimik appaaffiginerisigut amerlanerussuteqartunut iluaqutaanavianngilaq. Isertitartoqqunerusut appaaneq pissarsiaqaatiginerussavaat. Inuiaqatigiit tamanna pisariaqartinngilaat. Taamaammat GA-p tamatumunnga taarsiullugu sulinermut ilanngaammik eqqusisoqarnissaa siunnersuutigaa, taannalu isertitartoqqortuugaanni isertitakittuugaanniiluunniit tamanut assigiimmik qaffasissuseqassaaq.

-Taamaaliornikkut inuaqatigiinni isumaginninnikkut pitsaanerusumik oqimaaqatigiissitsineq pilersissinnaassavarput, suliffissaaleqisullu nunatsinni suliffinnut inuttaqanngitsunut kajumminerulernissaat angusinnaallutigu. Suliffissaqartitsiniarnikkut sunniuteqarluarnerusumik suliniartoqarnissaa pisariaqartipparput, taamaaliortoqassappallu pisortat namminersortullu akornanni pitsaanerusumik ataqatigiissaarisoqarnissaa suleqatigiittoqarnissaalu pisariaqarpoq. Aammattaaq naalakkersuisut suliniutaasa kingunerissavaa suliffeqarfiit suliniutinik nutaanik aallartisaanissaminnut akissaarunnissaat, tamannalu Kalaallit Nunaannut piffissaq qaninnerusoq ungasinnerusorlu eqqarsaatigalugu ajoqutaasinnaavoq, Brian Buus Pedersen isumaqarpoq.

Naalakkersuisut akileraarutitigut appaaniarnerminnut tunngavilersuutaasa pingaarnerit ilagaat, kalaallit amerlanerusut nunani allani ilinniarnermik kingorna Nunatsinnut utertalernissaat, tamannali aamma GA-p naalakkersuisullu isumaqatigiissutiginngilaat.

-Ilinniartut ilinniakkaminnik naammassinnillutik angerlarniartut amerlanerulernissaannut iluaqutaanissaa ilimaginngilluinnarpara. Tassunga atatillugu pisariaqartinneqartut tassaapput suliffeqarnikkut periarfissat pitsaasut, ineqarnikkut atugassarititaasut pitsaanerusut qitornallu paarineqarsinnaanissaannik qulakkeerisoqarnissaa. Tamakku arlaannaalluunniit akileraarutitigut appaanissamik siunnersuutip nassatarisaanik anguneqarnavianngillat. Ataatsimut isigalugu pingaaruteqanngitsutut sunniuteqarpianngitsutullu naligiissaarinertut taarusuppara, Brian Buus Pedersen naqissusiivoq, taannalu