Sulinermut ilanngaammik eqqussiniarneq SIK-p GE-llu qularnartoqartikkaat
Innuttaasut aningaasaatikinnerusut akileraarnikinnerulernissaat Naalakkersuisut 'sulinermut ilanngaammik' taallugu atuutsilerneqarnissaa eqqarsaatersuutigaat.
Sumiiffinnili avinngarusimanerusuni, soorlu Qaanaami, tunumi kujataanilu SIK-p siulittaasua naapertorlugu suliffissaaleqisoqaqaaq. Taakkunanilu sulinermut ilanngaat sunniuteqangaarunnannginnerarpaa.
- Suliffissaaleqiffiusuni annertunerusumik sunniuteqarnavianngilaq tassami qanorluunniit suliffissarsiortoqartigigaluaruni suliffissarsisinnaanngillat, SIK-p siulittaasua Jess G. Berthelsen oqarpoq, ilaasortamili amerlanerusunik pisissutaasinnaasunik peqalernissaannut siunertaq taperserlugu.
AAMMA ATUARUK Sulinermut ilanngaat isertitakkaanit aningaasalersorneqarsinnaasoq
- Soorunami eqqunneqarpat ilaasortatta ilaannut iluaqutaassaaq oqilisaasoqassallunilu.
Akileraarutinut akiliinikinnerulernerup suliffeqarnerup imminut akilersinnaanerulernissaa eqqarsaataavoq. Suliffeqarnermut ilanngaat assersuutigalugu 15 procentiuppat SIK-p akissarsiaritittagaannik annikinnerpaaffilerlugu qaammammut 660 koruuninik pisissutissaqarnerulersitsissaaq.
Sulisitsisullu kattuffiani GE-mi suliffeqarnermut ilanngaat aaqqiissutissatut aqqutissaanngissorineqarpoq.
- Suliffissaqanngippat kingunererusutaanik kinguneqarunnanngilaq. Imminullu akilersinnaanngitsillugu atuutsilernissaanut pissutissaqanngilaq, Sulisitsisut kattuffianni inatsiseqarnermut siunnersorti Karsten Klausen oqarpoq.