Sulinerminnut atatillugu napparsimalertarsoripput
Kigutit putuinut ilaartuutit 1960-kkunniit 1980-ip qiteqqunnissaata tungaanut atorneqartartut, kviksølvimik akullit kigutileriffimmi sulisut peqqissusaannut sunniuteqarnerluttarnera aamma nunatsinni pasitsaanneqartoq, Nuummi kigutilerisut ikiortaasa ningiuat Dorthe Johansen oqarpoq.
- Danmarkimi klinik assistentit suliffimminnut atatillugu napparsimalertarnertik misissuiffigeqqullugu piumasaqarnerat, ministerimit paasilluarneqalerpoq, maannalu misissuisoqarnissaa siunniunneqarluni. Taamaammat aamma uagut suleqatigiilluta aqagu naapeqatigiinniarpugut pissutsit uagutsinnut aamma atuummata, Dorthe Johansen oqarpoq nangillunilu:- TV-aviisikkut pisut saqqummiunneqaqqaarmatali aamma uagut paasisimavarput nappaatigilerneqartartut asserluinnaanik sulisuusimasutoqqat misigisaqartartut, ilaatigut arlaleriarlutik nakorsiartaraluarlutik paasineqarsinnaaneq ajorpoq suna ajoqutigineqarnersoq. Ilaatigut nappaatit makkua kigutilerisut ikiortaasa timimikkut malugisarpaat: niaqorlorujussuartarneq, merianngusarneq, anersaartornikkut ippigusunneq, inuummarlunneq taavalu timikkut ippigusuuteqartarneq, ilaatigullu ilisimajunnaartarneq. Maannakkut pasitsaapparput ukiut 20-it matuma siorna kviksølvi itumatsinnut attuutsillugu suliarisaratsigu, taavalu silaannarissarfeqanngitsumi akuuisarsimalluta. Piumasariniarparput klinik assistentit sukumiisumik misissuiffigineqarnissaat, paasineqarpallu ilumut kviksølvi timitsinnut ajoqutaasimasoq, piumasariniarparput taarsiiffigitinnissaq, Dorthe Johansen oqarpoq.
Kigutimikkut ilaartortereernikkut napparsimalersutut misigisartut aamma arlaqartut saaffiginnittarsimasut, Dorthe Johansen-ip ilanngullugu eqqaavaa.
Kigutinut ilaartuutit kviksølvimik akullit siornatigut assannik attuaallugit suliarinnitarneq maannakkut atorneqarunnaarsimasoq, Nuummi kigutit nakorsaat Isabelle Madsen oqarpoq.
