Sulinermi tarnikkut atukkat immikkut sammineqalersut
Sulinermi pitsaanngitsumik atugaqarneq suliffeqarfimmut sunniuteqarnerlusinnaavoq. Napparsimanerit amerliartuinnartut, sulerusussutsip appariartulernera sulisullu siunissamut ernumassuteqarnerat.
-Sakkortuupilussuuvoq, aamma maani nunatsinni. Unammilligassaq taanna, Suliffigissaaneq pillugu siunnersuisoqatigiinni ataatsimiikkaangatta eqqartortakkatta annersarisarpaat, aamma sulinermi tarnikkut atukkat pillugit suliniaqatigiiffinnut saaffiginnissutit amerlasuupilussuusarput. Sammisaq taanna akiorpassuarni imartusimaqaaq, inuilli maanna eqqartornerulerpaat. Uagut takusinnaasatsitut ajornartorsiut pisortat suliffeqarfiutaanni anneruvoq, sulisut pisortaat sulisullu aaqqiissuussaanermi appasinnerusumi inissisimasut kingunerini malugisarlugit, Lisbeth Frederiksen, Suliffigissaaneq pillugu siunnersuisoqatigiinni siulittaasup tullia, knr.gl-imut oqarpoq.
Qujanartumilli suliffeqarfiit sulisut qanoq pissuseqarfigineqarnissaannik sunillu piumasaqaateqarfigineqarnissaannik pilersaaruteqarnerisigut misigisat nuanniitsut tamakku ilarpassui pinaveersaartinneqarsinnaapput. Sullivinni avatangiisigissaarnerpaatut siorna nersornaatisisoq suliffeqarfik ingeniøritut siunnersuisarfik "Inuplan” sulisut akornanni iluarineqarluartunik ajornanngitsunik arfinilinnik maleruagassiorsimavoq. Maleruagassat arfinillit tassaapput suliamut piumasaqaateqarsinnaaneq, sulinermut sunniuteqaqataasinnaaneq, sulinerup isumaa, susassareqatigiinnikkut ikorfartoqatigiinneq, siulittuisinnaaneq sulinermullu akissarsitinneqartarneq.
Ajornartorsiutip pilerfia iluarsineqanngippat inuiaqatigiinnut kalaallinut ukiuni aggersuni akisuupilussuussaaq, sulinermimi tarnikkut atukkat pitsaasuunngitsut napparsimanernik amerlasoorsuarnik kinguneqartarput. Ajornartorsiutilli iluarsiniarneqarnissaanut sakkussarpassuaqarpoq. Sulisut pisortallu pisariaqarneranik imminnut nassuerutiginninnissaat taamaallaat pisariaqarpoq. Stressi inuup nammineq atugarisarpaa, ataatsimoorlunili ikioqatigiinnikkut aatsaat qaangerniarneqarsinnaavoq, Lisbeth Frederiksen oqarpoq.
Sulinermi atukkat 2013-milu sullivinni avatangiisigissaarnerpaamut nersornaat pillugu paasissutissat amerlanerusunik uani atuarneqarsinnaapput: www.at.gl
