Sulinermi atukkat ajornerunerat inuttassaaleqisitsivoq

Kigutit nakorsassaaleqineq ajortorsiutinngorsinnaavoq. Atorfinnit 30-init aqqanillit inuttassaqartinneqanngimmata illoqarfiit ilaat kigutit nakorsaqanngillat. Atorfeqarnermilu atugassarititaasut patsisaaqataasut, taamaaginnassappallu kingunerlussinnaasoq, Peqqissaaveqarfinnik Aqutsivimmi kigutit nakorsaasa pisortaat Finn Mathiassen naliliivoq:

- Kigutileriffigut nutaarluinnaapput. Taamaattumik atorfinikkusunnginnermut tamanna patsisaasinnaanngilaq, atugassarititaasulli allaanerunerat peqqutaaqataagunarpoq. Finn Mathiassen nassuiaavoq.

Danmarkimi kigutigissaasunik suliffissaaleqisoqanngilaq, maluginiagassaavorli  sulinermi atugassarititaasut Nunatsinnit naleqqiullugit allaanerunerat. Danmarkimi kigutit nakorsai sapaatip-akunneranut nalunaaquttap akunnerini 35-ni sulisarput, Nunatsinnili 40-ni sulisarlutik. Danmarkimi sapaatip-akunneri arfinillit sulinngiffeqartoqarsinnaavoq, Nunatsinnili sapaatip-akunneri tallimat periarfissaallutik.

Sulisussarsiortoqartuaraluarporli, kigutit nakorsaasa katersuuttarneranni, soorlu pikkorissartitsisoqaraangat ataatsimeersuartoqaraangallu peqataatitaqartoqartarluni. Taakku saniatigut Danmarkimi Sverigemilu aviisitigut aamma sulisussartoqartarpoq.

- Saaffiginnittulli amerlanerpaartaat sivikitsuinnarmik taartaarusussinnaasarput. Finn Mathiassen nassuiaavoq.

Nuummi kigutit nakorsassaaleqineq ajornartorsiutaanerpaavoq, aammali illoqarfiit soorlu Qaqortoq qaammatini marlunngortuni Qasigiannguillu qaammammi ataatsimi kigutit nakorsaqanngillat, atorfinitsitsisoqanngippallu ajornartorsiutinngorsinnaasoq kigutit nakorsaasa pisortaat Finn Mathiassen erseqqissaavoq.