Sulinermi akileraarutinut ilanngaat orniginartinneqarpoq
Inuit sulerisusseqartut akissarsiatigut ajunngitsorsiassaqartitaalissanersut pillugu Inatsisartunut aatsaat qinersisoqareerpat misissorneqaqqaartussaavoq, taamaattoq Demokraatit neriuutigaat, sulinermi akileraarutinut ilanngaatip aaqqissuussiffigineqarnissaanut partiit allat ilaliiumaartut.
- Sulineq imminut akilersinnaasuusariaqarpoq, taamaattumik ilanngaatip aaqqissuussiffigineqarneratigut aalaakkaasumik sulerususseqalersitsisoqarsinnaavoq. Periuseq tamanna Qallunaat Nunaani sivitsortumik iluatsilluareerpoq, tamannalu nunatta iluaqutigilluarsinnaagaa ilimagaara, Demokraatineersoq, Anda Uldum knr.gl-mut oqarpoq.
Qallunaat Nunaanni sulinermi akileraarutinut ilanngaat ukiumut 22.000 koruuniuvoq, ilanngaallu 2022-p tungaanut 34.000 koruuninut qaffakkiartuaartinneqarnissaa siunnertaavoq. Naak nunatsinni qanoq ilanngaaseeriaaseqartoqassanersoq maanna oqaatigineqarsinnaanngikkaluartoq - Qallunaat Nunaanni assigusumik tunaartaqartoqarsinnaasoq, Anda Uldum isumaqarpoq.
- Sulinermi akileraarutinut ilanngaatip killissaa pillugu politikkikkut tamanna isumaqatiginniutigineqaqqaartussaavoq, kisianni Qallunaat Nunaanni periuseq atorneqartoq aamma nunatsinni assigusumik ilanngaasiisalersinnaaneq periarfissatut mattukkusunngilara, periuseq iluaqutaavoq isumaqarpungalu tamanna inuiaqatigiit iluaqutigilluassagaat, Demokraatini aningaasaqarnermut tunngatillugu oqaaseqartartoq, Anda Uldum oqarpoq.