Sulinermi ajoqusertarnerit pillugit tunumi paasititsiniaalerput
Taamatut equngasoqarnera iluarsiniarlugu maanna suliniartoqalerpoq. Sulitilluni ajoqusernerit pillugut sullissivik paasititsiniaanermik aallartitsivoq pingasunngornermiillu sulisut tunumiissapput tassani inuuttaasut paasititsiniaavigissallugit sulitilluni ajoquseraanni periarfissat pillugit.
- Nassuerutigisariaqarparput sulitilluni ajoqusertoqarnerani periarfissat pillugit innuttaasunut paasissutissiisarnerput pitsaanerpaajusimanngimmat. Tamanna iluarseriarniarparput pingasunngornermiillu piniartut, kommuuni sulisitsisullu tunumi ataatsimeeqatigisassavagut. Tassani paasissutissiissutiginiarpagut pisinnaatitaaffiit pisussaaffiillu, Sulitilluni ajoqusernerit pillugut sullissivimmi Nuummi pisortaq Kristina Nordby-Rachlitz oqarpoq.
Allanngortiterinerit arlallit aqqusaareerlugit Sulitilluni ajoqusernerit pillugut sullissivik ingerlallualersimavoq taamalu paasititsiniaanissamut nukissaqalersimalluni. Piffissaqarfigineqalersut ilagaat tunu periarfissarlu iluatsillugu piniartut aalisartullu sillimmasernissamut periarfissaat paasititsiniaassutaaniarpoq.
- Sillimmasernissamut periarfissaq neqeroorutigisarput atorneqanngiusavippoq tassani ukiumut 1.800 koruuninik akiliinikkut ajutoornissamut aammalu inuussutissarsiummut attuummassuteqarnermik napparsimalernissamut sillimmasertoqarsinnaagaluartoq. Ajutooraanni ullormusiat pinearsinnaapput akit atuuttut atorlugit taakkulu pinearsinnaapput orluarsilluni anneraanni imaluunni napisimagaanni. Tungitsinniit isigalugu aaqqissuussineq ajunngivissuuvoq neriuppugullu tamatuma atorneqarnissaa kajumigineqalerumaartoq. Tassanimi periarfissaqarpoq aningaasarsiornissamut periarfissaqanngiffimmi aalaakkaasumik isertitaqarsinnaanissa, Kristina Nordby-Rachlitz oqarpoq.
Paasititsiniaanermi saaffigineqartut tassaapput sulisitsisut sulisullu, taakkulu sulitilluni ajoqusernernik nalunaarutiginninnermut eqqumanerulernissaat anguniarneqarpoq, tassani taarsiivigineqarnissamut periarfissat piniassammatigit.
- Ajornerpaaffianimi toqusoqarsinnaavoq imaluunniit suleqqissinnaajunnaartoqarluni, tamannalu ilaqutariinnut ajorluinnartussaavoq. Ajoquserneq uatsinnut nalunaarutigineqarsimappat qimataasut qitornaasullu uatsinniit ikiorserneqarsinnaapput aammalu ajoqusertup aningaasaqarniarnera ikiorsersinnaavarput suliffimmi annertuumik ajoqusersimappat, Kristina Nordby-Rachlitz oqarpoq, ilanngullugulu oqaatigaa quppersakkat plakatillu suliarineqarsimasut.
Plakatit quppersakkalu misissuataarniaraanni nittartakkami uani aaneqarsinnaapput: http://www.cfa.gl/grl/Selvbetjening/Informationsmateriale/Plakater%20og%20foldere.aspx
