Suligooq mattattugassaqarpoq

Ukiup sinneranut tikaagullittassiissutit sinneruttuusinnaasut tamarmik agguaateqqinneqangajalerput. Piniarnermut Naalakkersuisoq, Ane Hansen, tusagassiuutinut taama nalunaaruteqarpoq. Piniarnermi killiffik aamma pisassiinissaq pillugu ataatsimiititaliap isumaqatigiilluni inassuteqaataa taassuma taperserpaa.
Allattoq Carla Davidsen
septembarip 04-at 2012 12:21

Kitaani tikaagullittassat sinneruttut qulingiluaapput, Ammassalimmi arfineq-pingasut Illoqqortoormiunilu tallimat.

Kitaani Tunumilu ataatsimoorluni piniagassat sinneruttut Qaasuitsup Kommuniani, Qeqqata Kommuniani, Kommune Kujallermi Kommuneqarfik Sermersuullu kitaani kangianilu tigummiinnarneqassapput.

Tikaagullinnit 76-init qamutilissorluni Kitaani pisassanit sinneruttunit 16-it ataatsimoortumik piniagassatut pisassiissutigineqassapput.

Taakku ima agguataarneqassapput; Qaasuitsup Kommunianut arfineq-pingasut, Qeqqata Kommunianut marluk, Kommuneqarfik Sermersuup kitaanut pingasut Kommune Kujallermullu pingasut.

Tikaagullittaassiissutinit sinneruttut kommunit namminneq iluminni najukkami aalisartut piniartullu peqatigiiffii isumasioqatigereerlugit agguaasseqqinnissaminnut periarfissaqarput.

Piniarnermulli Naalakkersuisoqarfiup aamma ilisimatitsissutigaa nalunaarutinik suli tunniussisoqanngitsoorsimasinnaanera.

Piniartulli suli naammagittalaartariaqarput. Kitaanimi pisassiissuutinik agguaasseqqinnissaq sisamanngorpat septembarip ulluisa arfernganni aatsaat pissaaq.

Pisasseeqqittoqarnissaa ullormik ataatsimik sioqqullugu tikaagullinniarneq tamarmi inerteqqutaassaaq, aalisartut piniartullu kommunalbestyrelsemit tusarniaavigineqareerpata aatsaat aallarteqqinneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq