Suligooq arfiminertugassarpassuaqarpoq
Qoorortoorsorluni tikaagullittassat sinneruttut 13-it paggatassiissutaasut Naalakkersuisut nalunaarput. Maanna sila kisimi apeqqutaalerpoq tikaagulliit 13-it pisarineqarsinnaassanersut.
- Ukiariartornerani sila sivisuumik unerisimanngilaq, taamaattumik qoorortoorsorluni tikaagullinniarneq uninngasimavoq, aalisartut piniartullu kattuffianni KNAPK-mi siulitaasoq Leif Fontaine KNR-mut oqarpoq.
Piniartut siornatigut takutittareerpaat sila unerisimalersillugu pisaqalertorsinnaallutik.
- Assersuutigalugu ukiut marluk matuma siorna Uummannap sulluani ulloq ataaseq tikaagulliit sisamat pisarineqarput. Taassuma takutiinnarpaa pisaqarsinnaanermut sila qanoq apeqqutaatigisoq, Leif Fontaine oqarpoq.
Qamutilissortunut aamma suli tikaagullittassarpassuaqarpoq tikaagulliit 32-it suli pisarineqarsinnaammata.
Aamma suli qipoqqartassaqarpoq suli ataatsimik pisassaqarmat. Tikaagulliusaat arfineq marluk aamma suli pisassaapput.