Suligasuarsinnaasunik pilersitsinissaq siunniuppaat

Meeqqanik kinguaassiutitigut atornerluisoqarsimatillugu ikiuuttussanik suligasuarsinnaasunik piareersimasoqarnissaa kommuninit annertuumik pisariaqartinneqarpoq. Taamaattumik kommunini allani sulianik taamaattumik misilittagallit pikkorissut atorluarneqarnissaat anguniarlugu sillimasussanik piareersimasoqalernissaa anguniarneqalerpoq.

- Kommunit arlallit isumaginnittoqarfimmi sulissaaleqipput, isumaginninnermi siunnersortinik amigaateqartoqarpoq tarnillu pissusaannik ilinniarsimasunik peqarnatik. Taamaattumik atornerluisoqarsimatillugu inuppassuit eqqorneqartarmata immikkut suligasuartartussanik ikiuukkiartortartussanik pilersitsisoqarnissaa kissaatigisimavarput. Isumaginnittoqarfinni pisortat peqatigiiffianni siulittaasup tullia Bertha Kreutzmann nassuiaavoq.

Aamma erseqqissaatigaa, atornerluisimasoqarsimatillugu meeqqat kisimik eqqorneqarneq ajortut, ilaqutaasulli tamarmik ajornartorsiulertartut.

- Taama pisoqaraangat suliassavut aamma annertunerulertarput, ikiorneqarnissamillu pisariaqartitsisinnaalersinnaalluta. Bertha Kreutzmann oqarpoq.

Taamatuttaaq illoqarfinni nunaqarfinniluunnit minnerni inuit tamarmik imminnut ilisarisimasarnerat ikiuiniarnermi aporfiusinnaasartoq erseqqissaatigaa.

- Qanimut sullissinnaanngisavut imaluunnit aporfeqarfigisinnaasavut allaninngaannit taamaalillutik sullinneqarsinnaalissagaluarput. Bertha Kreutzmann erseqqissaavoq.

Aamma oqarpoq ullumikkut Ilaqutariinnermut Pisortaqarfimmiit kommuninut ikiuiniartarneq eqarpallaartumik ingerlasartoq, taamalu suliassat tuaviuussassaagaluit kinguartitsineqalersarlutik. Taamaattumik KANUKOKA ullumikkut kommunit qanimut suleqatigeriigaat qitiusumik saaffiginniffiusartuuppat suliniarneq sukkanerusumik ingerlanneqarsinnaasoq.