Suliffiutitaarniat periarfissarissaarnerulissapput
Suliffeqarfinnillu aallartitsiniat iternga tikillugu siunnersorneqartalissapput. Nunami suliffinnik pilersitserusussutsip pilerinarsarnissaa siunertaralugu inuussutissarsiutinik ineriartortitsisinnaanissamut pioreersunilluunniit siuarsaanissamut siunertaqarluni suliaq 2002-mili aallarnerneqarsimasoq maanna naammassivoq.
Inuussutissarsiutinik ineriartortitsinermut atukkat pitsaanerusut, inuussutissarsiutinillu siuarsaanissat nutaamik aaqqissuunneqarnera, tassaavoq nunatsinni suliffeqarfinnik nunami aallartitserusuttunut siunissami neqeroorutissat nutaat, inuussutissarsiornermut naalakkersuisup Johan Lund Olsenip ullumi tusagassiorfinnut katersortitsinermini oqaatigisai.
Siornatigut periaasiusimasut qimallugit, nunatta takornariaqartitsivia Greenland Tourism, suliffeqarfiutitaarniartunut siunnersuisarfinngussaaq Sulisaasimasorlu, nutaamik taagutitaartillugu aningaasaliisarfinngortinneqassaasoq Johan Lund Olsen oqarpoq. Suliffeqarfissat nutaat suliffeqarfiillu pioreersut sukkanerusumik siunnersorneqartalernissaat siunertaalluinnarnerarpaa.
Nunami suliffissamik aallarnisaaqataasimasoq Sulisamillu ikiorneqartoq Mikael Petersen periaasiussusamut nutaamut isumalluarpoq, periaasiusormi nutaaq najoqqutarikannerlugu suliffeqarfiutimi suli annerulersinniarlugu siunnersortippoq, periarfissaq nutaaq najoqqutaralugu oqinneralaarsuarmik siunnersorneqarnissani qularinngilaa.
Kalaalimiminernik agguilluni poortukkeriviutilik siunnersueriaatsimik nutaamik siunersorneqartoq Mikael Petersen taama oqarpoq.
Nunatsinni nunami suliffiutitaarusuttut siunnersorumallugit kajumissaarusullugillu paasititsiniaafigineqarnissaat tullinnguuppoq.